ಸಸಿಹಿತ್ಲು ಶ್ರೀ ಭಗವತೀ ಕ್ಷೇತ್ರ ಪರಿಚಯ
ಸಸಿಹಿತ್ಲು ಶ್ರೀ ಭಗವತೀ ಕ್ಷೇತ್ರ ಪರಿಚಯ
ಬರೆವು: ಸರಸ್ವತಿ ಅಮಿತ್ ಬಜಪೆ
ಪರಶುರಾಮನ ಸೃಷ್ಠಿ ಪನ್ಪಿನ ಪುಗಾರ್ತೆನು ಪಡೆವೊಂದು, ಪುಂಚದ ಮಣ್ಣುಡು ನಾಗನಿಲೆತ ಪಂಚವರ್ಣದ ಮಣ್ಣು ನಮ್ಮ ಈ ಪೊರ್ಲುದ ತುಳುನಾಡು. ಈ ತುಳುನಾಡು ಇನಿಕು ಪಜ್ಜೆಗೊಂಜಿ ದೈವಸ್ಥಾನ ದೇವಸ್ಥಾನೊಲೆಡು ದೈವ ದೇವೆರು ನೆಲೆ ಆವೊಂದು ತುಳುವೆರೆನ ಭಕ್ತಿಗು ಒಲಿದು ಭಕ್ತೆರೆನಾ ಇಷ್ಟಾರ್ಥೋಲೆನು ಈಡೇರಿಸಾವೊಂದುಲ್ಲೆರು ನಮ ನಂಬಿಂಚಿತ್ತಿನ ದೈವ ದೇವೆರು. ತುಳುನಾಡುದ ಪುಣ್ಯದ ಮಣ್ಣು ಇನಿಕು ಲೋಕೋರ್ಮೆ ಧಾರ್ಮಿಕ ತತ್ವದ ನೆಲೆಟು ಭಾರಿ ಪುಗಾರ್ತೆನು ಪಡೆತೊಂದುಡು. ಬಡಕಾಯಿ ಬಾರ್ಕೂರುಡ್ದು ತೆಂಕಾಯಿ ನೀಲೇಶ್ವರ ಮುಟ್ಟ, ಮೂಡಾಯಿ ಗಟ್ಟೋಡ್ದು ಪಡ್ಡಾಯಿ ಕಡಲುದ ನುಗುರು ಪೊಯ್ಯಮುಟ್ಟ ನಮ್ಮ ತುಳುನಾಡುದ ಪುಣ್ಯದ ಮಣ್ಣುದ ಕಮ್ಮೆನ ಪಸೆರೊಂದುಂಡು. ಧರ್ಮ ಮೆರೆಯೊಂದು ಉಪ್ಪುಂಚಿತ್ತಿನ ಈ ತುಳುನಾಡುಡು ಸುಮಾರು 18 ಕ್ಷೇತ್ರೋಲೆಡು ತನ್ನ ಕಲೆ ಕಾರ್ಣಿಕ ತೋಜಾವೊಂದು, ಶರಣು ಪಂದು ಬತ್ತಿನ ಭಕ್ತೆರೆನು ತನ್ನ ಮಟ್ಟೆಲುಡು ಪಾಡೊಂದು ಮಾನಾವೊಂದು, ನೆಲೆ ಆತಿನಾ ಅಪ್ಪೆ ಭಗವತೀನ ಬಾರಿ ಮಲ್ಲ ಕಾರ್ಣೀಕದ ಧರ್ಮ ಇತ್ತಿನ ಪುಣ್ಯ ಕ್ಷೇತ್ರ ಸಸಿಹಿತ್ಲು ಶ್ರೀ ಭಗವತೀನ ದಿವ್ಯ ಸಾನಿದ್ಯ. ಅಪ್ಪೆ ಭಗವತೀ ಈ ಪುಣ್ಯದ ಮಣ್ಣುಗು ಎಂಚ ಬತ್ತೆರು, ದಾಯೆಗು ಬತ್ತೆರು, ಧರ್ಮ ತತ್ತು ಪೋಯಿನ ಭೂಮಿಡು ಧರ್ಮ ರಕ್ಷಣೆ ಮಲ್ಪರೆ ಬತ್ತೆರಾ, ಇಂಚಿತ್ತಿನಾ ಅವ್ವೆತೋ ವಿಚಾರೊಲೆನು ತೆರಿಯರೆ ಸಾದ್ಯ ಇಜ್ಜಿ. ನರಮಾನಿ ಜನ್ಮದ ಗೋಚರೋಗು ಬೈದಿಂಚಿತ್ತಿನ ಸತ್ಯೋನು. ತಾಳೆಗರಿ ಶಾಸನದ ಆದರ ಪತೊಂದು. ನಡರಿದ ಪೊರ್ತುಡು ಅಪ್ಪೆ ಭಗವತೀನ ಸುಗಿಪುದ ಆಧಾರದ ಮಿತ್ತು. ಒಂಜಾತು ಮಲ್ಲ ಮಲ್ಲ ಬರಹಗಾರೆರೆನಾ ಬರವುದ ಆಧಾರ ಪತೊಂದು. ಕ್ಷೇತ್ರದ ಅಧ್ಯಕ್ಷೆರಾಯಿನ ವಾಮನ್ ಇಡ್ಯಾ ಮೇರು ಬರೆತಿನ ಕ್ಷೇತ್ರ ಪರಿಚಯ ಪುಸ್ತಕೊಡು ಒಂಜಾತು ವಿಚಾರೊಲೆನು ನಮ ತೆರಿಯೊನರೆ ಸಾದ್ಯ ಉಂಡು. ಪುರಾಣದ ಇತಿಹಾಸದ ಪ್ರಕಾರ. ದಾರುಮತಿನ ಮಗೆ ದಾರಿಗಾಸುರೆ ಅಟ್ಟಹಾಸೊಡು ಮೆರೆಯೊಂದು ಈ ಜಗತ್ತುದ ಅಧಿಪತಿ ಈಶ್ವರನು ಸ್ತುತಿ ಮಲ್ತೊಂದು ತಪ್ಪಸ್ಸು ಮಲ್ಪುವೇ. ದಾರಿಗಾಸುರನ ಕಠಿಣ ತಪಸ್ಸುಗು ಒಲಿನ ಈಶ್ವರಡ ವರೊನು ಕೇನುವೇ. ಈ ಭೂಮಿದ ಮಿತ್ತು ತಾನು ಚಿರಂಜೀವಿಯಾದು ಉಪ್ಪೊಡು. ಇಡೀ ಭೂಮಂಡಲ ತನ್ನ ಕೈವಶ ಆವೋಡು. ರಾತ್ರಿ ಪಗೆಲುಡು ಎನನು ವಾ ನರಮಾನಿಲಾ ಕೆರಿಯರೆ ಆವರೆ ಬಲ್ಲಿ ಪಂದು ಎಂಕು ವರೋನು ಕೊರುಲಾ ಪಂದು ಕೇನುನಗಾ. ಈಶ್ವರ ದೇವರು ಈ ಭೂಮಿಡು ಪುಟ್ಟಿನಯಗು ಮರಣ ಉಂಡು. ಅವೆನು ಏರೆಡಾಲಾ ತಪ್ಪಾವರೆ ಸಾದ್ಯ ಇಜ್ಜಿ. ಅಪ್ಪೆ ಬಂಜಿಡು ಬರಂದಿನ ಒಂಜಿ ಪೊಣ್ಣಡ ನಿಕ್ಕು ಮರಣ ಪಂದು ವರೊನು ಕೊರ್ಪೆರು. ಅಂಚೆನೆ ಈಶ್ವರ ದೇವರೆಡ ಅರೆನಾ ಪೂಜೆದ ಸೊತ್ತಲುಲೆನು ಪಡೆವೊನುವೆ. ಈಶ್ವರ ದೇವೆರೆಡೆ ವರೊನು ಪಡೆವೊನಿನ ದಾರಿಗಾಸುರೆ, ಈ ಭೂಮಿದ ಮಿತ್ತು ನನ ಎಂಕು ಮರಣ ಇಜ್ಜಿ ಯ್ಯಾನೇ ದೇವೆರು ಪಂದು ಧರ್ಮ ತತ್ತುದು ನಡಪುವೆ. ದಾರಿಗಾಸುರನ ಅಟ್ಟಹಾಸ ಮಿತಿ ಮೀರಿನ ಪೊರ್ತುಡು ದೇವಾನು ದೇವತೆಲು ಪೂರಾ ಒಂಜಾದು ಆಧಿಶಕ್ತಿ ಜಗನ್ಮಾತೆನು ಸುಗಿಪುವೆರು. ಆಧಿಮಾಯೆ ಜಗನ್ಮಾತೆ ದೇವಾನು ದೇವತೆನಕಲಾ ಭಕ್ತಿಗು ಒಲಿದು ಭೂಮಿದ ಮಿತ್ತುದ ಅನಾಚಾರೊಲೆಗು ಈಶ್ವರನ ಮಗಲಾದು ಪುಟುದು ಯ್ಯಾನು ಪರಿಹಾರ ಕೊರ್ಪೆ. ಪಂಡುದು ಅಭಯ ವಾಖ್ಯೋನು ಕೊರ್ಪೆರು. ಅಂಚೆನೆ ಈಶ್ವರನ ಮೂಜಿನೆ ಕಣ್ಣುಡು ಕಣ್ಣನೀರುದ ಪನಿತ ಮೂಲಖ ಈಶ್ವರನ ಬಲತ ತೊಡೆಕು ಬೂರುದ ಕುರುತ ರೂಪೋಡು ಮಹಾಕಾಳಿಯಾದು ಜನ್ಮ ಪಡೆವೊನುವೆರು. ತನ್ನ ಜನ್ಮೊಗು ಕಾರಣ ಈಶ್ವರ ದೇವೆರೆಡ ಕೇನುವೆರು. ದಾರಿಗಾಸುರನ ಅಟ್ಟಹಾಸದ ಕತೆನು ತೆರಿಪಾದು ತನ್ನ ಪೂಜೆದ ಸೊತ್ತುಲೆನು ಪಿರ ಗೆತೊನುಲಾ ದಾರಿಗಾಸುರನ ಅಂತ್ಯ ಮಲ್ಪುಲ ಈ ಭೂಮಂಡಲೊನು ರಕ್ಷಣೆ ಮಲ್ಪುಲ ಪಂದು ಈಶ್ವರ ದೇವೆರು ಅಪ್ಪಣೆ ಮಲ್ಪುವೆರು. ಅಂಚೆನೆ ತನ್ನ ಗಣೊಕುಲೆಡು ಬಾರಿ ಶಕ್ತಿದ ಗಣ ಗುಳಿಗನು ಒಟ್ಟುಗು ಕಡಪುರುವೆರು. ಜಗತ್ತುದ ಅಧಿಪತಿನ ಅಪ್ಪಣೆದಂಚೆನೆ ಮಹಾಕಾಳಿ ಗುಳಿಗನೊಟ್ಟು ಭೂಮಿಗು ಜತ್ತು ಬರ್ಪೆರು. ಭೂಮಿಗು ಜತ್ತು ಬತ್ತಿನ ಅಪ್ಪೆ ಮಹಾಕಾಳಿ, ಒಂಜಿ ಪರಬುನ ರೂಪೊಡು ದಾರಿಗಾಸುರನಡೆಗು ಪೋದು ಸುರುಕಾದು ಈಶ್ವರ ದೇವೆರೆಡ ಪಡೆವೊಂದಿನ ಪೂಜೆದ ಸೊತ್ತುಲೆನು ಉಪಾಯೊಡು ಕೈವಶ ಮಲ್ತೊನುವೆರು. ಈ ಪೂಜೆದ ಸೊತ್ತುಲೆನು ಪಡೆವೊನಿ ಕೂಡ್ಲೇ ದಾರಿಗಾಸುರೆ ತಾನು ಮೋಸ ಪೋಯಿನ ವಿಚಾರೊನು ತೆರಿಯೊಂದು ಮಹಾಕಾಳಿನ ಶಕ್ತಿನು ತೆರಿಯಂದೆ ಯುದ್ದೊಗು ಜಪ್ಪುವೇ. ನಾನಾ ರೂಪೊಡು ಮಹಾಕಾಳಿನು ಕಣ್ಣುಕಟ್ಟಾವೆ. ಮಹಾಕಾಳಿನ ಶಕ್ತಿನು ಎದುರಿಸರಾವಂದೆ ಕಡೆಕು ತನ್ನ ಸಾರತ್ತ ಒಂಜನೇ ರೂಪೋಡು ಬೊಲ್ದು ಕೋರಿಯಾದು ಪಾತಾಳೊಗು ಬಲಿಪುನ ಪೊರ್ತುಡು. ಮಹಾಕಾಳಿ ತನ್ನ ರೌದ್ರವಾತಾರೊಡು ಕೋರಿದ ರೂಪೊಡು ಇತ್ತಿನ ದಾರಿಗಾಸುರನ ಒಂಜೊಂಜೆ ತೂಯಿನ ಒಯಿತೊಂದು ಚಿತ್ರಹಿಂಸೆ ಕೊರ್ದು ದಾರಿಗಾಸುರನ ಸಂಹಾರ ಮಲ್ಪುವೆರು. ಅಡೆಗು ಅಧರ್ಮೊಡು ಮೆರೆವೊಂದು ಇತ್ತಿನ ದಾರಿಗಾಸುರನ ಅಂತ್ಯ ಆಪುಂಡು. ದಾರಿಗಾಸುರನ ಸಂಹಾರ ಆಯಿನ ಸುದ್ದಿ ತೆರಿನ ಅಪ್ಪೆ ದಾರುಮತಿ, ಬ್ರಹ್ಮನು ಕಠೋರ ತಪಸ್ಸುದ ಮೂಲಖ ಉಂಡು ಮಲ್ತೊಂದು ವರೊನು ಕೇನುವೊಲು ತನ್ನ ಮಗನ ಅಂತ್ಯೊಗು ಕಾರಣ ಆಯಿನಲೆನ ಸಂಹಾರ ಮಲ್ಪುನ ಶಕ್ತಿನು ಕೇನ್ನಗ, ಅವೊಂಜಿ ಬುಡ್ದು ಬೇತೆ ದಾಲ ಕೇನ್ಲಾ. ಅಪಗಾಂಡ ತನ್ನ ಕೈಟು ಇತ್ತಿನ ಸೊತ್ತು ಅಲೆನ ಮಿತ್ತು ಬೂರಿ ಕೂಡ್ಲೇ ಕೋರ ಕೋಟ್ಲೇ ರೋಗ ಬರ್ಪಿಂಚಿತ್ತಿನ ವರೊನು ಪಡೆವೊಂದು ದಾರುಮತಿ ಮಹಾಕಾಳಿನು ನಾಡೊಂದು ಬನ್ನಗ. ಎದುರು ತಿಕಿನ ಮಹಾಕಾಳಿನ ಮಿತ್ತು ಒಂಜಿ ಪುಂಡಿ ಪೊಯ್ಯೊನು ದಕ್ಕುವೊಲು. ಬ್ರಹ್ಮ ದೇವೆರೆಡಾ ಪಡೆವೊಂದಿನ ವರತ ಬಲೊಟು ದಾರುಮತಿ ದಕ್ಕಿನ ಪೊಯ್ಯ ಮಹಾಕಾಳಿನ ಮಿತ್ತು ಬೂರ್ದು ಕೋರಕೋಟ್ಲೇ ಸೀಕುಡು ಮಹಾಕಾಳಿ ನರಳುವೆರು. ವಿಷಯ ತೆರಿನ ಈಶ್ವರ ದೇವೆರು ಕೋಪೊಡು ಪರ್ವತದ ಕಲ್ಲುಗು ತನ್ನ ಮಂಡೆನು ದರ್ಪುವೆರು. ಆ ಪೊರ್ತುಗು ಸೀಕುನು ಗುಣ ಮಲ್ಪುಂಚಿತ್ತಿನ ಘಂಟಾಕರ್ಣ ಉಂಡು ಆವೋನುವೆರು. ತನ್ನ ವಿಶೇಷ ಶಕ್ತಿಡು ಮಹಾಕಾಳಿನ ಸೀಕುನು ಗುಣ ಮಲ್ಪುವೆರು. ಈ ಪೊರ್ತುಗು ಮಹಾಕಾಳಿದ ರೂಪೊನು ಬುಡ್ದು ಚಿರುಂಭ ಭಗವತೀ ಪನ್ಪಿನ ಪುದರುಡು ಅಪ್ಪೆ ಭಗವತೀನು ಈಶ್ವರ ದೇವರು ದರ್ಮ ರಕ್ಷಣೆ ಮಲ್ಪರೆಗಾದು ಭೂಮಿಗು ಕಡಪುರುವೆರು. ದರ್ಮೊಡು ನಡಪುನಕಲೆನು ರಕ್ಷಣೆ ಮಲ್ಪುಲಾ ದರ್ಮ ತತ್ತು ಪೋಯಿನಕಲೆಗು ಶಿಕ್ಷೆನು ಕೊರ್ದು ಸರಿ ತಾಜಿಗು ಕನಲಾ ಪಂನ್ಪಿಚಿತ್ತಿನ ಅಭಯೊನು ಕೊರ್ಪೆರು. ಈಶ್ವರ ದೇವೆರೆಡ ಅನುವು ಗೆತೊನೊಂದು ಗಂಧದ ಪಡವುನು ಏರೊಂದು ತನ್ನ ಬಲತುಡು 33 ಕೋಟಿ ದೇವತೆಲೆಗು ಅಧಿಪತಿ ಆದುಪ್ಪುನ ಘಂಟಾಕರ್ಣನು ತನ್ನ ಎಡೊಟು 66 ಕೋಟಿ ರಕ್ಕಸೆರೆಗು ಅಧಿಪತಿಯಾದುಪ್ಪುನ ದಂಡರಾಜನು ಜೊತೆ ಮಲ್ತೊಂದು ಮನುಕುಲದ ರಕ್ಷಣೆಗಾದು ಗುಳಿಗನೊಟ್ಟು ಪಿದಾಡೊಂದು ಭೂಮಿಗು ಜತ್ತು ಬರ್ಪೆರು ಅಪ್ಪೆ ಭಗವತೀ ಆಧಿ ಮಾಯೇ. ಪೇರುದ ಕಡಲುದ ನಡುಟು ಬರ್ಪಿನ ಪೊರ್ತುಗು ಜಲದುರ್ಗೆ ತಿಕ್ಕುವೆರು ತನ್ನೊಟ್ಟುಗು ಈಲಾ ಬಲ್ಲ ನಮ ಭೂಮಿದ ಮಿತ್ತು ದರ್ಮ ರಕ್ಷಣೆದ ಕಾರ್ಯ ಮಲ್ಪೊಡು ಪನ್ನಗಾ, ದಾರಿಕಾಸುರನು ಸಂಹಾರ ಮಲ್ತಿನ ನಿಕ್ಕು ಅಸುರ ಕ್ರಿಯೆದ ಪೂಜೆ ಯ್ಯಾನು ದೇವ ಕ್ರೀಯೆದ ಪೂಜೆ ಪಡವುನುನಾಲು ಅಂಚಾದು ಉಪ್ಪುನಗಾ ನಮ ಈರ್ವೆರು ಎಂಚ ಒಟ್ಟುಗು ಉಪ್ಪರೆ ಸಾದ್ಯ ಪಂದು ಜಲದುರ್ಗೆ ಕೇನುವೆರು ಅದಗ ಅಪ್ಪೆ ಭಗವತೀ ಎನ್ನಾ ಬಲತ ಮರ್ಗಿಲುಡು ನಿಕ್ ಸ್ಥಾನ ಕೊರ್ದು ದೇವ ಕ್ರೀಯೆದ ಸುರುತ ಪೂಜೆನು ಈ ಕರಿತೊನಿ ಬೊಕ್ಕ ಎನ್ನಾ ಅಸುರ ಕ್ರೀಯೆದ ಪೂಜೆ ಪಡೆತೊನುವೆ. ಯ್ಯಾನು ರೌದ್ರ ರೂಪೊಡು ಭಕ್ತೆರೆನು ಕಾತೊನುವೇ ಈ ಶಾಂತ ರೂಪೊಡು ಭಕ್ತೆರೆನ ಇಷ್ಟಾರ್ಥೋನು ನೆರವೇರಿಸಾವೊಂದು ಭಕ್ತೆರೆನ ಪರಿಪಾಲನೆ ಮಲ್ಪುಗ ಪಂದು ಅಭಯ ಕೊರ್ಪೆರು. ಅಕ್ಕ ಭಗವತೀನ ಅಭಯದ ನುಡಿದಂಚ ಜಲದುರ್ಗೆ ಲಕ್ಷ್ಮೀಯಾದು ಎಳೆಯ ಭಗವತೀ ಪನ್ಪಿನ ಪುದರುಡು ಭಗವತೀನೊಟ್ಟುಗು ಭೂಮಿಗು ಜಪ್ಪುವೆರು. ಇಂಚ ಭೂಮಿಗು ಜಪ್ಪುನ ಪೊರ್ತು ಪಂಜುರ್ಲಿ ಭಗವತಿನು ತಡೆಪುವೆ ಅಪ್ಪೆ ಭಗವತೀನೊಟ್ಟುಗು ಯದ್ದೊಡು ಸೋತುದು ಅಪ್ಪೆ ಭಗವತೀನ ಕಲೆಕಾರ್ಣಿಕ ತೆರಿಯೊಂದು ಪಡವುಡು ಅಪ್ಪೆ ಭಗವತೀನ ಬೆರಿಕೊರೊಂದು ಬರ್ಪೆರು. ಇಂಚ ದುಂಬು ದುಂಬು ಬರ್ಪಿನ ಪೊರ್ತುಡು ಭೂಮಿದ ಮಿತ್ತು ನಿಲೆ ಆವರೆಗು ನಮಕು ಒಂಜಿ ಎಡ್ಡೆ ಜಾಗ ಬೋಡು ಪಂದು ಪಂಜುರ್ಲಿಡ ನನ ಏತು ದೂರ ಉಂಡು ನಮ ಪೋಪಿನ ಸಾದಿ ಪಂದು ಕೇನುನಗ. ಬತ್ತಿನ ಸಾದಿ ಕಮ್ಮಿ, ನನ ಪೋಪಿನ ಸಾದಿ ಮಸ್ತು ಉಂಡು ಪಂದು ಪಂಜುರ್ಲಿ ಸುಳ್ಳು ಪನ್ಪೆರು. ಪಂಜುರ್ಲಿನ ಪಾತೆರೊಡು ಸುಳ್ಳುನು ತೆರಿಯೊಂದು, ಗುಳಿಗಡ ಕೇನುವೆರು. ಅದಗ ಗುಳಿಗೆ ಬತ್ತಿನ ಸಾದಿ ಮಸ್ತು, ನನ ಪೋಪಿನ ಸಾದಿ ಕಮ್ಮಿ ಪಂದು ಸತ್ಯ ನುಡಿನಗಾ. ಪಂಜುರ್ಲಿನ ಸುಳ್ಳು ಪಾತೆರದ ಕೋಪೊಗು ಘಂಟಾಕರ್ಣೆ ಪಂಜುರ್ಲಿನು ಕಡಲುಡ್ದು ಭೂಮಿದ ಮಿತ್ತು ದಕ್ಕುವೆರು. ನನ ಈ ಎಂಕಲನೊಟ್ಟುಗು ಬರ್ಪಿನಿ ಅಗತ್ಯ ಇಜ್ಜಿ ಭೂಮಿದ ಮಿತ್ತು ನರಮಾನಿಲೆನ ಕುಟುಂಬದ ಅಧಿಕಾರದ ದೈವ ಆದು ನರಮಾನಿಲೆಡ ನಿನ್ನ ಸೇವೆನು ಕರಿತೊನುಲಾ ಪಂದು ಅಭಯದ ನುಡಿ ಕೊರ್ಪೆರು ಅಪ್ಪೆ ಭಗವತೀ. ಅಲ್ತುರುಡ್ದು ಪಡವು ದುಂಬು ದುಂಬು ಪೊವೊಂದು ಬಾರಿ ಪೊರ್ಲಕಂಟುದ ಜಾಗೇ ಬಾರಿ ಒಂಜಿ ಪ್ರಶಾಂತವಾಯಿನ ಜಾಗೆ ಪಚ್ಚೆ ಪೈರು ಜಿಂಜಿದು ಮನಸ್ಸುಗು ಉಲ್ಲಾಸ ಕೊರ್ಪಿಂಚಿತ್ತಿನ ಜಾಗೆ ಆಯಿನ ಸಸಿಹಿತ್ಲುದ ಪುಣ್ಯದ ಮಣ್ಣುದಲ್ಪ ಪಡವು ಬರಿಕು ಬರ್ಪುಂಡು. ಸಸಿಹಿತ್ಲುದ ಮಣ್ಣುದ ಕಮ್ಮೆನ ಅಪ್ಪೆ ಭಗವತಿನು ಸೆಳೆಯುಂಡು. ದೊಂಬುದ ಪೆಟ್ಟುಗು ಪಡವು ಏರೊಂದು ಬೈದಿನ ಅಪ್ಪೆ ಭಗವತಿಗು ಈ ಸಸಿಹಿತ್ಲುದ ಮಣ್ಣುಡು ಒಂತೆ ಪೊರ್ತು ಕುಲ್ಲುದು ಆಯಾಸ ಪರಿಹಾರ ಮಲ್ತೊನರೆ ಮನಸ್ಸಾಪುಂಡು. ಸಮಾದಾನ ತಿಕ್ಕುನಂಚಿನ ಈ ಜಾಗೆಡು ಒಂತೆ ಪೊರ್ತು ಕುಲ್ಲುದು ಪೋಯಿ ಪಂಡುದು, ಪಡವುನು ಬರಿಕು ಪಾಡುದು. ಬಾರಿ ಮಲ್ಲ ಗೋಲಿದ ಮರತ ಅಡಿಟು ನಾಲು ಶಕ್ತಿಲು ಬತ್ತುದು ಕುಲ್ಲುವೆರು. ಆತು ಪೊರ್ತುಗು ಕೊಂದ ಕಣ್ಣಾಯ ಪನ್ಪಿನ ಮಲಯಾಳಿ ಬಿಲ್ಲವೇ ಮಾನವ ರೂಪೊಡು ಇತ್ತಿನ ಈ ನಾಲು ಶಕ್ತಿಲೆನು ತೂಪೆ. ಬಡವು ಬಾಜೊಲುಡು ಕಣ್ಣು ತೋಜಂದೆ ಪನಿ ಈತು ಅಸರುಗಾದು ಕೊಂದ ಕಣ್ಣಾಯಡ ಅಸರುನು ಕೇನುವೆರು. ಕೊಂದ ಕಣ್ಣಾಯ ತಾರೆಗು ಮಿತ್ತರ್ದು ಬೊಂಡ ಗೆತ್ತುದು, ಕೆತ್ತದು ಒಟ್ಟೆ ಮಲ್ತುದು ಮಲ್ಲ ಪಲ್ದಿ ಅಪ್ಪೆ ಭಗವತಿಗು ಕೊರ್ಪೆ. ಬಡವು ಬಾಜೊಲುಡು ಕಣ್ಣು ತೋಜಂದಿನಾತು ಕಂಗಾಲಾದು ಇತ್ತಿನ ಅಪ್ಪೆ ಭಗವತಿ ಕೊಂದ ಕಣ್ಣಾಯೇ ಒಟ್ಟೆ ಮಲ್ತು ಕೊರಿನ ಬೊಂಡೊನು ದುಂಬು ಪಿರ ಯೋಚನೆ ಮಲ್ಪಂದೆ ಗಲ ಗಲ ಪಂದು ಪರ್ಪೆರು. ನರ ಮಾನವೆ ಕೊರಿನ ಬೊಂಡೊನು ಪರಿನಾ ಪಲ್ದಿ ಭಗವತೀಗು. ಮೆಗ್ದಿ ಜಲದುರ್ಗೆ ಈ ಜಾತಿ ಬುಡಿಯಾ. ಎಂಕು ಕೊರ್ತಿನ ಬಾಷೆನು ಮದತ ಪಂದು ಕೋಪೊಡು ಪನ್ನಗಾ. ಅಪ್ಪೆ ಭಗವತಿ ಮೆಗ್ದಿನು ಸಮದಾನ ಮಲ್ಪುವೆರು. ನಮ ನೀರು ಕೇನ್ನಗಾ ತಾರೆದ ಮರಕು ಮಿತ್ತರ್ದು ಬೊಂಡೊನು ಕೊರಿಯೆ ಎನ್ನಾ ಅಸರುನು ತೆಕ್ಕಾಯೆ. ವಾ ಕಲ್ಮಶಲ ದಾಂತಿನ ಅಯನ ಮುಗ್ದ ಮನಸ್ಸುನು ತೆರಿಯೊಂದು. ಅಮೃತೊಗು ಸಮನಾಯಿನ ಆಯೆ ಕೊರಿನ ಬೊಂಡೊನು ಪರಿಯೇ. ಅಂಚಾದು ಉಪ್ಪುನಗಾ. ಈ ಜಾಗೆ ಎನ್ನಾ ಮನಸ್ಸುಗು ಬಾರಿ ಒಂಜಿ ಶಾಂತಿ ಸಮದಾನೊನು ಕೊರೊಂದು ಉಂಡು. ಯ್ಯಾನು ಎನ್ನಾ ಗಣೋಕುಲೆನ ಒಟ್ಟುಗು ಮುಲ್ಪನೆ ನೆಲೆ ಆವೊನುವೆ. ಈ ಮುಲ್ಪೊಡ್ದು ಒಂತೆ ದುಂಬು ಪೋನಗ ಮೂಲಿಕಾ ಪುರ ತಿಕ್ಕುಂಡು ಅಲ್ಪ ಜಲದುರ್ಗೆ ಆದು ನೆಲ ಆವೊನುಲಾ. ಪಂದು ಮೆಗ್ದಿನು ಸಮದಾನ ಮಲ್ಪುವೆರು ಪಲ್ದಿನ ಪಾತೆರೊಗು ಎದುರು ಪಾತೆರಂದೆ ಪಲ್ದಿನು ಬುಡ್ದು ಪೋಪಿನ ಬೇಜಾರುಡು ನನ ನಮ ಏಪಾ ತಿಕ್ಕುನು ಪನ್ಪಿನ ಮೆಗ್ದಿನ ಬುಲಿಪುಗು. ಪ್ರತಿ ವರ್ಷ ನಿನ್ನಾ ವರ್ಷದ ಪರ್ವೊನು ಕರಿತೊನುನಾ ಪೊರ್ತುಗು ಯ್ಯಾನು ಎನ್ನಾ ಪರಿವಾರದೊಟ್ಟುಗು ಬರ್ಪೆ. ನಿನ್ನ ಪರ್ವೊನು ಕರಿತೊಂದು ಬೊಕ್ಕಾ ಎನ್ನಾ ಪರ್ವೊನು ಕರಿತೊನುವೆ ಉಂದು ತಲೆ ತಲಾಂತರ ಮುಟ್ಟಲ ತಪ್ಪರೆಗಿಜ್ಜಿ ಪಂದು ವಾಗ್ಧನ ಕೊರ್ಪೆರು. ಪಲ್ದಿನ ಸಮದಾನದ ಪಾತೆರಾ ಕೇನೊಂದು ಮೆಗ್ದಿ ಭಗವತೀ ಮೂಲಿಕಾಪುರೊಟು ಪೋದು ನಿಲೆ ಆವೊನುವೆರು. ತೀಯಾ ಜನಾಂಗದ ಕೊಂದ ಕಣ್ಣಾಯನ ನಿರ್ಮಲವಾಯಿನÀ ಭಕ್ತಿಗು ಒಲಿನ ಅಪ್ಪೆ ಭಗವತೀ ಸಸಿಬಿತ್ತುಲುಡು ನಿಲೆ ಆವೊನುವೆರು ಸುಮಾರೂ 800 ವರ್ಷದ ಇತಿಹಾಸೋನು ಪಡೆವೊಂದಿನ ಭಗವತೀನ ಈ ಪುಣ್ಯ ಕ್ಷೇತ್ರ ನಾಲು ಸುತ್ತಲಾ ಪರಪುನ ನಂದಿನಿ ತುದೆ ಕುಡೊಂಜಿ ಮೈಟು ಪರತೊಂದು ಬರ್ಪಿನ ಶಾಂಭವಿ ತುದೆ ಈ ರಡ್ಡು ತುದೆಲು ಒಂಜಾಪಿನ ಜಾಗೊಡೇ ಅಪ್ಪೆ ಭಗವತೀ ನಿಲೆ ಆತಿನ ಜಾಗೆ. ಅಪ್ಪೆನ ಸಾನಿದ್ಯದ ಎದುರು ಪರಪುನ ನಂದಿನಿ ತುದೆ ಪಿರಾವೂಡು ಬಾನೋಗು ಅರಬಾಯಿ ದೀಪಿನ ಕಡಲು ನೆತ್ತ ನಡುಟು ಉಂಡು ಅಪ್ಪೆ ಭಗವತೀನ ದಿವ್ಯ ಸನ್ನಿದಾನ. ಇತಿಹಾಸದ ಹಿನ್ನಲೆ ಪ್ರಕಾರ ಸಸಿಬಿತ್ತುಲುಡೇ ಇತ್ತಿನ ಅಪ್ಪೆನ ಭಂಡಾರದ ಇಲ್ಲು. ಕಾಲ ಕ್ರಮೆಣ ಇತಿಹಾಸ ಸೇರುಂಡು. ಅಲ್ತುರುಡ್ದು ಬೊಕ್ಕಾ ಬಂಗೇರ ತರವಾಡುದಕಲು ಅಪ್ಪೆನ ಮೂರ್ತಿ ತುಂಬುನ ಅಧಿಕಾರದೊಟ್ಟುಗು ಪ್ರದಾನ ಅಚರ್ಕೆರೆನ ಅಧಿಕಾರಲ ಪಡೆವೊನುವೆರು. ತೀಯಾ ಜನಾಂಗದ ಏಳೂರುದ ಜಾತಿ ಬಾಂಧವೆರೆನ ಕುಲದೇವಿಯಾದು ಭಕ್ತೆರೆನ ರಕ್ಷಣೆ ಮಲ್ತೊಂದುಲ್ಲೆರು. ಅಪ್ಪೆ ಭಗವತೀಗು ತೀಯಾ ಜನಾಂಗದಕುಲು ಪೂಜೆ ಮಲ್ಪುನ ಅಧಿಕಾರ ಇತ್ತುಂಡಲಾ ಸಸಿಬಿತ್ತುಲುದ ಮಾತಾ ಜಾತಿದಕಲೆಗು ಈ ಅಪ್ಪೆ ಭಗವತೀ ಗ್ರಾಮ ದೇವಿಯಾದು ಸರ್ವ ಜಾತಿದ ಭಕ್ತೆರೆನುಲಾ ಮಟ್ಟೆಲುಡು ಮಾನಾವೊಂದು ಕಾತೊಂದು ಉಲ್ಲೆರು. ಕಾಲ ಕ್ರಮೇಣ ಅಪ್ಪೆ ಭಗವತೀನ ಸನ್ನಿದಾನೊಡು ದೇವಸ್ತಾನದ ಆಡಳಿತ ಮಂಡಳಿದಕುಲು, ಕಾರ್ನವೆರು, ಆಚಾರಪಟ್ಟಿನಕುಲು, ಗ್ರಾಮದ ಮೊಗವೀರ ಸಮುದಾಯ, ಬಿಲ್ಲವ ಸಮುದಾಯ ಅಂಚೆನೆ ಏಳೂರುದ ತೀಯಾ ಸಮುದಾಯದ ಭಕ್ತೆರು, ಸರ್ವ ಜಾತಿದ ಭಕ್ತೆರು ಸೆರೋಂದು, ಕುಲದೇವಿಯಾದು ಗ್ರಾಮ ದೇವಿಯಾದು ಭಕ್ತೆರೆನು ರಕ್ಷಣೆಮಲ್ಪುನ ಅಪ್ಪೆಗು ನಿತ್ಯ ಪೂಜೆದ ಸಂಕಲ್ಪ ಮಲ್ತೊಂದು, 1995 ಇಸವಿಡು ದೇವಸ್ಥಾನ ಜಿರ್ಣೋದ್ದಾರ ಮಲ್ಪುನ ಕಾರ್ಯೊಗು ಜಪ್ಪುವೆರು. ಅಪ್ಪೆ ಭಗವತೀನ ಸಾನಿದ್ಯೊಡು. ತಿರ್ಥ ಮಂಟಪ ಗರ್ಭಗುಡಿತ ಒಟ್ಟುಗು ಸುತ್ತುಪೌಳಿ ನಿರ್ಮಾಣ ಆಂಡು. ಕುಡ 2014ನೇ ಇಸವಿಗು ನಂಬಿಂಚಿತ್ತಿನ ಭಕ್ತೆರೆನು ಇಂಬು ಕೊರ್ದು ಕಾತೊನುನ ಅಪ್ಪೆಗು. ಸಾನಿದ್ಯೋಡು ಪೊಸತು ಬಿಂಬ ಪ್ರತಿಷ್ಠೆ. ಆನೆ ಚಪ್ಪರ ಪ್ರವೇಶದ್ವಾರ. ರಾಜಗೋಪುರ, ಆಧಿಸ್ಥಳ ತೀರ್ಥಕೆರೆ ಇಂಚಿತ್ತಿನ ಪೊಸ ನಮೂನೆದ ಬದಲಾವಣೆದೊಟ್ಟುಗು ಬಾರಿಗೌಜಿ ಗದ್ದಲೊಡು ಬ್ರಹ್ಮಕಳಶದ ಪರ್ವಲಾ ನಡತು ಬತ್ತುಂಡು ಉಂದು ಕಜ್ಜೊಡು. ಊರುದ ಮೋಗವೀರ ಬಾಂದವೆರು, ಬಿಲ್ಲವೆರು ಏಳೂರುದ ತೀಯಾ ಜಾತಿ ಬಾಂದವೆರು ಅಂಚೆನೆ ಅಪ್ಪೆನ ಮಾತ ಭಕ್ತೆರು ತನು ಮನ ದನದ ಸೇವೆನು ಸಂದೈತ ಮಲ್ದಿನವೆನು ಕ್ಷೇತ್ರದ ಆಡಳಿತ ಮಂಡಳಿ, ಬೊಕ್ಕಾ ಕಾರ್ನವೆರು ನೆನಪು ಮಲ್ತೊನುವೆರು ಕ್ಷೇತ್ರದ ಕಾರ್ನವೆರೆರಾಯಿನ ಶ್ರೀನಿವಾಸ ಯಾನೇ ಅಪ್ಪು ಪೂಜಾರಿ ಮೆರೆನ ಬಾರಿ ಮಲ್ಲ ಆಸೆ ಅಪ್ಪೆನ ಉತ್ಸವ ಮೂರ್ತಿ ಬಂಗಾರುಡು ಸಿಂಗಾರ ಆವೊಡು ಪನ್ಪಿನ. ಅಂಚನೆ ಆಡಳಿತ ಸಮೀತಿದಕುಲು ಕಾರ್ನವೆರು. ಕುಲ ಬಾಂಧವೆರೆನು ಊರುದ ಪರವೂರುದ ಭಕ್ತೆರೆನು ಒಟ್ಟು ಮಲ್ತೊಂದು, ಮಹಾ ಸಂಕಲ್ಪ ಮಲ್ತೊಂದು, ಭಕ್ತೆರೆನಾ ದಾನಿಲೆನಾ ಸಹಾಯ ಸಹಾಕಾರೊಡು ಸುಮಾರೂ ನಾಲು ಕೋಟಿ ರೂಪಾಯಿಡು ಅಪ್ಪೆನ ಉತ್ಸವ ಮೂರ್ತಿನು ಸಂಪೂರ್ಣವಾದು ಬಂಗಾರುಡು ಸಿಂಗರ ಮಲ್ತೆರು.
ನಡರಿ
ಅಪ್ಪೆನ ಸಾನಿದ್ಯೊಡು ವರ್ಷದ ಪರ್ವ ನಡರಿ ಬಾರಿ ವಿಷೇಷವಾಯಿನ ಜಾತ್ರೆ. ಸಸಿಬಿತ್ತಿಲುದ ಊರುದಕಲೆಗು ಉಂದು ಗ್ರಾಮದ ಜಾತ್ರೆ. ಜಾತಿ ಬಾಂದವೆರೆಗು ಕುಲದೇವಿನ ಜಾತ್ರೆ. ಭಗವತೀನು ನಂಬಿಂಚಿತ್ತಿನ ಭಕ್ತೆರೆಗು ಭಗವತೀನ ನಡರಿದ ಜಾತ್ರೆ. ಬಪ್ಪನಾಡು ಜಾತ್ರೆದ ಕೊಡಿ ಜಾಯಿನೆ ರಡ್ಡನೇ ದಿನತಾನಿ ನಡಪುಂಡು ಸಸಿಬಿತ್ತುಲುದ ಅಪ್ಪೆನ ನಡರಿದ ಪರ್ವ. ಬಪ್ಪನಾಡುದ ಅಪ್ಪೆ ಜಲದುರ್ಗೆ ಮೆಗ್ದಿಗು ಕೊರ್ತಿನ ಭಾಷೆದ ಪ್ರಕಾರ. ಪಲ್ದಿ ಭಗವತೀ ಮೆಗ್ದಿನ ಸಾನಿದ್ಯೊಗು ಪೋಪೆರು. ಆನಿಡ್ದು ಇನಿಕುಲಾ ಈ ಮೆಗ್ದಿ ಪಲ್ದಿನ ಬಾವನಾತ್ಕಕ ಬೇಟಿದ ಐತಿಹಾಸಿಕ ಕ್ಷಣತ ಪೊರ್ಲುನು ತೂವರೆಗು ಪಂಡುದೆ ಭಕ್ತೆರು ರಾಶಿ ರಾಶಿ ಸಂಖ್ಯೆಡು ಒಟ್ಟು ಸೇರುವೆರು. ಬಪ್ಪನಾಡುದ ಅಪ್ಪೆ ಜಲದುರ್ಗೆನ ವರ್ಷದ ಪರ್ವೊಗು ಕದಿಕೆದ ತನ್ನ ಭಂಡಾರದ ಇಲ್ಲಡ್ದು ಪಲ್ದಿ ಭಗವತೀ ಆವೇಶೊಡು ತನ್ನ ಪರಿವಾರ ಸಮೇತ ಸುಮಾರು 8 ಮೈಲು ನಡತೊಂದು ಪೋದು ಮೆಗ್ದಿನ ವರ್ಷದ ಪರ್ವೊಡು ಜೊತೆಯಾಪಿನ ಆಪೊರ್ಲುನು ತೂಪಿನಾನೆ ಒಂಜಿ ಭಾಗ್ಯ ಪಂದು ಪನೋಲಿ. ಮೆಗ್ದಿ ಪಲ್ದಿನ ಬೇಟಿದ ಪೊರ್ತುಡು ಮೆಗ್ದಿ ಜಲದುರ್ಗೆ ಕೈ ಸನ್ನೆ ಕಣ್ಣು ಸನ್ನೆದ ಬಾಷೆಡು ಅಪ್ಪೆ ಭಗವತೀ ಮಲಯಾಳಿ ಬಾಷೆಡು ಪಾತೆರೊಂದು. ಮೆಗ್ದಿ ಪಲ್ದಿನ ಮೋಕೆನು ತೂಪಿನಾನೆ ಒಂಜಿ ಸೌಭಾಗ್ಯ. ಮೆಗ್ದಿನ ಜಾತ್ರೆನು ಕರಿತೊಂದು ಬಪ್ಪನಾಡುದ ಕೊಡಿ ಜಾಯಿನೆಗೆ ಅಪ್ಪೆ ಭಗವತೀ ತನ್ನ ಪರಿವಾರ ಸಮೇತ ಪಿರ ಕದಿಕೆದ ತನ್ನ ಭಂಡಾರಿಲ್ಲಗು ಬತ್ತು ಸೇರೊನುವೆರು. ಕುಡ ಬಯ್ಯಗು ತನ್ನ ವರ್ಷದ ಪರ್ವ ಕರಿತೊನರೆ ಭಂಡಾರದ ಇಲ್ಲಾಡ್ದು. ತುದೆತ ಆಪೆದ ಮೈಟು ಉಪ್ಪುನ ತನ್ನ ಆಧಿಸ್ಥಳ ಸಸಿಬಿತುಲುಗು ಆವೇಶೋಡು ಪರಿವಾರ ಸಮೇತ ಭಂಡಾರ ಏರೊಂದು ಪಲ್ಲಂಕಿಡು ಕುಲ್ಲೊಂದು ಅಪ್ಪೆ ಭಗವತೀ ತನ್ನ ಮೂಲ ಜಾಗೆನು ಸೇರೋನುವೆರು. ಮನದಾನಿ ಸಾನಿದ್ಯದ ನಾಗಗುನಾಗ ತಂಬಿಲದೊಟ್ಟುಗು ಪೂಜೆನು ಕರಿತೊಂದು ಬಯ್ಯಡು ರಾಶಿ ರಾಶಿ ಮಲ್ಲಗೆಡು ಸಿರಿ ಸಿಂಗಾರ ಆವೊಂದು ಬತ್ತಿನ ಭಕ್ತರೆಗು ಅನ್ನ ಪ್ರಸಾದೊನು ಕೊರೊಂದು. ರಾತ್ರೆ 12 ಗಂಟೆಗು ಮಹಾಪೂಜೆದೆ ಒಟ್ಟುಗು ಅಪ್ಪೆ ಭಗವತೀ ಮಲ್ಲಿಗೆಡು ಐತಾ ಆತಿನ ದಂಡಿಗೆನು ಏರೋಂದು 64 ಸುತ್ತುದ ಸುತ್ತ ಬಲಿಕು ಪಿದಾಡುವೆರು ಅಂಚೆನೆ ಅಂಗನೊಡು ನಾಲು ಸುತ್ತೊಡುಲಾ ಕಂಚೀಲುದು ಜೋಕುಲು ಈ ಕಂಚೀಲು ಪರಕೆ ಅಪ್ಪೆಗು ಬಾರಿ ಪ್ರೀತಿದ ಸಿರಿ ಪರಕೆ. ಜೋಕುಲು ಬಾಲೆಲೆಗು ಸೀಕು ಸಂಕಡ ಬನ್ನಗ ಅಪ್ಪೆನು ನೆನತೊಂದು ಜೋಕುಲೆಗು ಬೈದಿಂಚಿತ್ತಿನ ದುರಿತೊಲೆನು ದೂರ ಮಲ್ಪಲೆ ಅಪ್ಪೆ ಭಗವತೀ ಇರೆಗು ಕಂಚೀಲುದ ಪರಕೆ ಸಂದೈತಾ ಮಲ್ಪುವ ಪಂದು ಕೈ ಮುಗಿದು ನಟೋನುವೆರು ಸೀಕು ಗುಣ ಆಯಿನೆಗೆ ಅಪ್ಪೆ ಭಗವತೀನ ಸನ್ನಿದಾನೋಡು ನಡರಿದ ಪರ್ವದಾನಿ ಜೋಕುಲೆನು ಮದ್ಮಯೆ ಮದಿಮಾಲು ಐತಾ ಮಲ್ಪಾವೊಂದು, ಅಪ್ಪೆನ ಮೋಕೆದ ಪರಕೆ ಕಂಚೀಲು ಸೇವೆನು ಸಂದಾವೆರು. ಸುರುತಾ ಸಾಲು ಸುತ್ತುದ ಬಲಿಕಲ್ಲುಸೇವೆ ದಾರಿಗಾಸುರನು ಸಂಹಾರ ಮಲ್ದಿನ ಸಂಕೇತವಾದು ಅಸುರ ಕ್ರಿಯೆಡು ಬೊಕ್ಕದಾ ದೇವತಾ ಕ್ರೀಯೆಡು ಬಲಿಕಲ್ಲುಗು ಚರ್ವದೊಟ್ಟುಗು ಬಲಿ ಸೇವೆ ನಡಪುಂಡು. ಪುಲ್ಯ ಕಾಂಡೆ ನಡಪುನಂಚಿನ ಮೂರ್ತಿ ದರ್ಶನದ ಪೊರ್ತು. ಈ ಘಳಿಗೆಗೋಸ್ಕರನೇ ಇಡೀ ಊರೂಗು ಊರೇ ಸೇರೊಂದು ಅಪ್ಪೆನ ಮೂರ್ತಿ ದರ್ಶನೊಡು ಬಾಗಿ ಆಪೆರು. ಭ್ರಾಹ್ಮೀ ಮೂಹುರ್ತೊಡು ಅಪ್ಪೆನ ಪ್ರಧಾನ ಅರ್ಚಕೆರಾದುಪ್ಪುನ ಕಾರ್ನವೆರು ಪಟ್ಟೆ ಸೀರೆನು ತುತ್ತೊಂದು ಸಿರಿ ಸಿಂಗಾರ ಆತಿನಾ ಭಗವತೀ ಅಪ್ಪೆನ ಮೂರ್ತಿನು ಮಂಡೆಡು ಏರಾವೊಂದು, ಅಂಗನ ಜಪ್ಪುಂಚಿತ್ತಿನ ಪೊರ್ತು. ಅಂಗನದ ನಾಲು ಮೈಟುಲಾ ಕಂಚೀಲುದ ಬಾಲೆಲೆನು ಪುಗ್ಗೆಲುಡು ತುಂಬೊಂದು ಮಡಸ್ತಾನಾದೊಟ್ಟುಗು ಬಾರಿ ಗೌಜಿಡು ನಡಪುಂಡು ಮೂರ್ತಿ ದರ್ಶನ ಬಲಿ. ಸೇರ್ದುಂಚಿತ್ತಿನ ಭಕ್ತೆರು. ಅಪ್ಪೆನ ಮೂರ್ತಿ ದರ್ಶನದ ಪೊರ್ಲುನು ತೂವರೆಗು ಪಂಡುದೆ ಭಕ್ತಿ ಪರವಶೋಡು ಕೈಮುಗಿದು ಅಪ್ಪೆನು ಸುಗಿಪುವೆರು. ಮೂರ್ತಿ ದರ್ಶನೊಡ್ದು ಬೊಕ್ಕಾ ತುಲಭಾರಸೇವೆ, ಅಪ್ಪೆ ಭಗವತೀ ಪರ್ವತೊಡು ಕುಲ್ಲೊಂದು ಬತ್ತಿನ ಭಕ್ತೆರೆಗು ನಂಬೊಲಿಗೆದ ಪ್ರಸಾದೊನು ಕೊರ್ಪೆರು. ಆನಿ ಮದ್ಯಾಹ್ನಾ ಅಪ್ಪೆ ಭಗವತೀ ಪರಿವಾರ ಸಮೇತವಾದು ಭಂಡಾರ ಏರೋಂದು ಪಿರ ತನ್ನ ಕದಿಕೆದ ಭಂಡಾರದ ಇಲ್ಲು ಸೇರೊನುವೆರು.
ಭರಣಿ ಪರ್ವ ಸಂಭ್ರಮ
ಭಗವತೀ ಅಪ್ಪೆನ ಸನ್ನಿದಾನೋಡು ಏಳು ದಿನತ ಪರ್ವ ಅಪ್ಪೆನ ಸಾನಿದ್ಯೊಡು ನಡರಿದ ದಾರ್ಮಿಕ ಕಾರ್ಯಕ್ರಮ ಮುಗಿನ ಮನದಾನಿ ಕೊಡಿ ಏರೋಂದು ಅಪ್ಪೆನ ಏಳು ದಿನತ ಜಾತ್ರೆ ನಡಪುನಂಚಿನ ಭರಣಿ ಉತ್ಸವದ ಸಂಭ್ರಮ ಏಳು ದಿನಾಲಾ ಮದ್ಯಾಹ್ನಾ ರಾತ್ರೆ ಮಹಾಪೂಜೆ ನಾಲನೆ ದಿನ ಪುಷ್ಪಕಳ. 6 ನೇ ದಿನ ಚರ್ತುಕಳ. ಏಳನೆ ದಿನತಾನಿ ಸರ್ಪಕಳತೊಟ್ಟು ನರ್ತನ ಸೇವೆ, ಕಂಚೀಲು ಸೇವೆ, ತೂಟೆದಾರ ಅಮೃತ ಕಳಶ ಆಯೆರ ತಿರಿ ಪಡ್ಡಾಯಿ ಬಲಿ ಮೂಡಾಯಿ ಬಲಿ ಇಂಚಿತ್ತಿನ ದಾರ್ಮಿಕ ಕಾರ್ಯಕ್ರಮೊಲು ಈ ಏಳು ದಿನತ ಜಾತ್ರೆಡು ಪ್ರಧಾನವಾದು ಉಪ್ಪುಂಡು ಈ ಭರಣಿ ಉತ್ಸವ ಪಂಡ ಅಪ್ಪೆ ಭಗವತೀನ ಜನ್ಮ ಭರಣಿ ನಕ್ಷತ್ರೋಡು ಆತಿನ ಪ್ರಕಾರ ಭರಣಿ ನಕ್ಷತ್ರೊಡೆ ಈ ಜಾತ್ರೆ ನಡಪೊಡು ಪನ್ಪಿನ ನಂಬೊಲಿಗೆ. ಆಂಡಾ ಸಸಿಬಿತ್ತುಲುಗುಲಾ ಬಪ್ಪನಾಡುದ ಅಪ್ಪೆಗುಲಾ ಮೆಗ್ದಿ ಪಲ್ದಿನಾ ಸಂಬಂದ ಇತ್ತಿನೇಡ್ದಾಸ್ರಾದು. ಬಪ್ಪನಾಡುದ ಅಪ್ಪೆನ ಜಾತ್ರೆದ 2ನೇ ದಿನ ಅಪ್ಪೆ ಭಗವತೀನ ಜಾತ್ರೆ ನಡಪುನ ಸಂಪ್ರದಾಯ. ಅಂಚಾದು ಈ ಭರಣಿ ನಕ್ಷತ್ರ ಮೂಜಿ ವರ್ಸೊಗೊರ ಇಜಿಂಡ 5 ವರ್ಸೊದ ಸಮಯ ಸಂದರ್ಬೊಗು ಅನುಸಾರವಾದು ಸಸಿಬಿತ್ತಲುಡು ಭರಣಿ ಮಹೋತ್ಸವ ನಡಪುಂಡು.
ಗೆಜ್ಜೆ ಸೇವೆ
ಅಪ್ಪೆ ಭಗವತೀನ ದಿವ್ಯ ಸನ್ನಿದಾನೋಡು ಗೆಜ್ಜೆ ಸೇವೆ ಬಾರಿ ವಿಶೇಷವಾಯಿನ ಅಪ್ಪೆನ ಮೋಕೆದ ಪರಕೆ. ಸಸಿಹಿತ್ಲು ಭಗವತೀ ದಶವಾತರ ಮಂಡಳಿ ಪನ್ಪಿನ ಪುದರುಡು. ಶ್ರೀ ಭಗವತೀ ಮಹಾತ್ಮೆ ಪನ್ಪಿನಾ ಕಥಾ ಪರ್ವದ ಮುಖಾಂತರ ತುಳುನಾಡೊರ್ಮೆ ಬಾರಿ ಪುಗಾರ್ತೆನು ಪಡೆತಿನ ಮೇಳ ಸಸಿಹಿತ್ಲು ಭಗವತೀ ಮೇಳ. ಇನಿಕಾನಗ ಬಾರಿ ಪುಗಾರ್ತೆದ ಭಾಗವತೆರು ಕಲಾವಿದೆರೆನು ಒಟ್ಟು ಸೇರಾವೊಂದು ರಾಜೇಶ್ ಗುಜರನ್ ಮೆರೆನಾ ಮುತಾಲಿಕೆಡು.. ಬೇತೆ ಬೇತೆ ಯಕ್ಷಗಾನ ಕತೆತ ಮೂಲಕ ಬಾರಿ ಪುಗಾರ್ತೆನು ಪಡೆತೊಂದುಡು.
ಅಂಚೆನೆ ಸನ್ನಿದಾನೊಡು ವರ್ಷ ಇಡೀ ನಡಪುನಂಚಿತ್ತಿನ ಬೇತೆ ಬೇತೆ ದಾರ್ಮಿಕ ಕಾರ್ಯಕ್ರಮೊಟು ಪ್ರಮುಖವಾದು ಪ್ರತಿಷ್ಠಾ ವರ್ಧಂತಿದಾನಿ ಚಂಡಿಕಾಯಾಗ. ಅಂಚೆನೆ 9 ದಿನ ನಡಪುನಂಚಿನ ನವರಾತ್ರಿ ಉತ್ಸವ. ನವರಾತ್ರಿ ಉತ್ಸವದ ಪೊರ್ತುಡು ಸನ್ನಿದಾನೊಡು ಊರುದ ಪರವೂರುದ ಭಕ್ತೆರೆನ ಸೇವೆಲು ಶ್ರೀ ಕ್ಷೇತ್ರೋಡು ನಡಪುಂಡು. ನವರಾತ್ರಿದ 9 ದಿನಾಲ ಅನ್ನದಾನ ಸೇವೆ ನಡಪುಂಡು. ನವರಾತ್ರಿ ಉತ್ಸವೊನು ಕರಿತೊಂದು ನವರಾತ್ರಿದ 10 ನೇ ದಿನತಾನಿ ಅಪ್ಪೆನ ಸಾನಿದ್ಯೋಡು ಪೊಸ ಅರಿತಾ ನಡರಿದ ಪರ್ವ ಕೊರಲು ಕಟ್ಟುದು ಅಪ್ಪೆಗು ಪೊಸ ಅರಿತಾ ನೈವೇದ್ಯ ಸಮರ್ಪಣೆ ಮಲ್ತಿ ಬೊಕ್ಕ ದೇವಾಸ್ಥಾನದ ಕಾರ್ನವೆರು ಅರ್ಚಕೆರೆನಕುಲು ಚಾಕಿರಿದಕುಲು ಆಚಾರಪಟ್ಟಿನಕುಲು ಏಳೂರುದ ಗುರಿಕಾರನಕುಲು ಪೊಸ ಅರಿತಾ ವಣಸು ಮಲ್ಪುನ ಕ್ರಮ ಉಂಡು. ಅಂಚೆನೆ ಪ್ರತೀ ಶುಕ್ರವಾರ ಸಾನಿದ್ಯೊಡು ವಿಶೇಷ ಪೂಜೆ, ಭಕ್ತೆರು ಭಕ್ತಿಡು ಕೊರಿನಾ ಅನ್ನದಾನ ಸೇವೆಲಾ ನಡಪುಂಡು. ಕ್ಷೇತ್ರೋಡು ಪ್ರಮುಖವಾದು ಪೂತ ಪೂಜೆ, ಅಲಾಂಕಾರ ಪೂಜೆ ಸರ್ವಲಂಕಾರ ಪೂಜೆ, ಕುಂಕುಮಾರ್ಚನೆ. ಇಂಚಿನ ಅವ್ವೆತೋ ಸೇವಲು ನಿತ್ಯೊಲ ಅಪ್ಪೆಗು ಭಕ್ತೆರು ಸಂದೈತಾ ಮಲ್ಪುವೆರು.
ಬರ್ಪಿಂಚಿತ್ತಿನ ದುರಿತೊಲೆನು ದೂರ ಮಲ್ತೊಂದು ನಂಬುದು ಬತ್ತಿನ ಭಕ್ತೆರೆನು ಇಂಬು ಕೊರ್ದು ಕಾಪುನ ಭಗವತೀ ಅಪ್ಪೆ ಸಸಿಬಿತ್ತುಲುದ ಪುಣ್ಯದ ಮಣ್ಣುಡು ನಿಲೆಯಾದು ಸರ್ವರೆನುಲಾ ಕಾತೊಂದು ಉಪ್ಪುನ ಅಪ್ಪೆ ಭಗವತಿಗು ತರೆ ತಗ್ಗಾದು ಬೆರಿ ಬಗ್ಗಾದು ಕೈ ಮುಗಿಯೊಂದು, ಊರುಗು ಬರ್ಪಿಂಚಿತ್ತಿನ ದುರಿತೊಲೆನು ದೂರ ಮಲ್ತೊಂದು ಇರೆನು ನಂಬಿಂಚಿತ್ತಿನ ಭಕ್ತೆರೆನು ಮಟ್ಟೆಲುಡು ಪಾಡೊಂದು ಮಾನದು ಕಾಪುಲೆ ರಕ್ಷಣೆ ಮಲ್ಪಲೇ ಅಮ್ಮಾ ಭಗವತೀ
ಬರೆವು: ಸರಸ್ವತಿ ಅಮಿತ್ ಬಜಪೆ