ಮಾಯೊದ ಪುಣ್ಣಮೆ: ಕಥಾ ಧಾರಾವಾಹಿ | ಭಾಗ-೩

ಮಾಯೊದ ಪುಣ್ಣಮೆ: ಕಥಾ ಧಾರಾವಾಹಿ | ಭಾಗ-೩

ಕರಿವಾರೊದ…..

{ ಇಲ್ಲದ ಉಲಯಿರ್ದ್ ಕಾರ್ದ ಗೆಜ್ಜೆದ ಸಬ್ದ ಕೇನುಂಡು… ನಾಲ್ ಜನ ಜವನೆರ್ ಕೊಂಡೆಕೆಬಿ ಮಲ್ತ್‌ದ್ ಆ ಗೆಜ್ಜೆದ ಸಬ್ದ ಬರ್ಪಿ ಕಡೆಕ್ ತೂಪೆರ್…}

ಮಾಯೊದ ಪುಣ್ಣಮೆ: ಕಥಾ ಧಾರಾವಾಹಿ | ಭಾಗ-೧

ಮಾಯೊದ ಪುಣ್ಣಮೆ: ಕಥಾ ಧಾರಾವಾಹಿ | ಭಾಗ-೨

AUTHOR: M RAMA ISHWARANAMGALA 

ತೂನಗ.. ದೇವಲೋಕಡ್ದ್ ಜತ್ತ್‌ ಬತ್ತ್‌ದ್ ಉಂತಿಲೆಕ್ಕ. ಒಂಜಿ ಪೊಣ್ಣು ಉಂತೊಂದಲ್.. ಅಳೆನ ಕೈಟಿತ್ತಿನ ಲಾಟನ್‌ದ ಬೊಲ್ಪುಗು.. ಅಲೆನ ಪೊರ್ಲು ಬೊಕ್ಕಲ ಜಾಸ್ತಿಯೆ ತೋಜೊಂದುಂಡು… ರವಿ, ದೀಚು , ಚೇತು, ರಾಘು, ಬಾಯಿ ಬಾಯಿ ಬುಡ್ದು ಆ ಪೊಣ್ಣನೇ ತೂಪೆರ್… ಏರಪ್ಪಾ ಈತ್ ಸೋಕುದ ಸುಂದರಿ..!!? ಎಂಕ್ಲು ಎನ್ನಿನೆ ಅಜ್ಜಿ ಮಾತ್ರ ಈ ಇಲ್ಲಡ್ ಉಪ್ಪುನೆಂದ್.. ಇತ್ತೆ ತೂನಗ. ಒಂಜಿ ಪೊಣ್ಣುಲ ಉಲ್ಲಲ್..!

ಆ ಲಾಟನ್ ಪತೊಂದಿನ ಪೊಣ್ಣು ಮೊಕ್ಲೆನ್ ತೂದು ಇಲ್ಯೆಡ್ ತೆಲಿಪುವಲ್… ಆ ತೆಲಿಕೆಗೇ ಮೊಕ್ಲು ಮರ್ಲಾದ್ ಪೋಯೆರ್.. ಆ ಪೊಣ್ಣು.. ಮೊಕ್ಲೆಡ.. ಅಜ್ಜಿ ಪಂಡೆರ್ ನಿಕ್ಲು ಜಾಲ್‌ಡ್ ಜೆಪ್ಪುನ ಬೊಡ್ಚಿಗೆ.. ಇಲ್ಲದ ಉಲಯಿ ಬರೊಡುಗೆ ಪನ್ದ್ ವೈಯ್ಯಾರಡ್ ಪನ್ದ್ ಉಲಯಿ ಪೋಪಲ್… ವಿಚಿತ್ರೊ..! ಎಲಾ. ನಮ್ಮ ಗುರ್ತು ಪರಿಚಯ ಇಜ್ಜಂದಿನ ಮೊಕ್ಲು ನಮನ್ ಉಲಯಿ ಲೆತ್ತೊಂದುಲ್ಲೆರ್..! ಒರ್ಯದೊರಿ ಪಾತೆರೊಂಡೆರ್.. ಕಡೆಕ್ ಇಲ್ಲದ ಉಲಯಿ ಪೋಪುನೆಂದ್ ನಿರ್ಧಾರ ಮಲ್ತ್‌ದ್. ಸೀನಡ ವಿಸಯ ಪನ್ಪೆರ್… ಸೀನೆ ನಿಕ್ಲು ಉಲಯಿ ಜೆಪ್ಪುವರ್ಂಡ ಜೆಪ್ಪುಲೆ.. ಯಾನ್ ಮುಲ್ಪ ಜಗಲಿಡೆ ಜೆತ್ತೊನುವೆಂದ್ ಪನ್ದ್.. ಜಾಲ್‌ರ್ದ್ ಜಗಲಿಗ್ ಬತ್ತ್‌ದ್ ಕುಂಟು ಅಡಿಕ್ ಪಾಡ್ದ್ ಜೆಪ್ಪರೆ ತಯಾರಾಪೆ …

ದೀಚು, ರಾಘು, ರವಿ, ಚೇತು, ಮೊಕ್ಲು ಜಾಲ್‌ಡ್ ನೆಲಕ್ಕ್ ಪಾಡಿನ ಕುಂಟುನ್ ಪುಗೆಲ್‌ಗ್ ಪಾಡೊಂದು ಇಲ್ಲದ ಉಲಯಿ ಪಿದಾಡುವೆರ್… ಬಾಕಿಲ್‌ಡ್ ಉಂತುದು.. ಅಜ್ಜೀ… ಎಂಕ್ಲು ಉಲಯಿ ಬರೊಲಿಯಾ.. ಪನ್ದ್. ಕೇನ್ನಗ ಉಯಿಡ್ದ್ ಅಜ್ಜಿ ಬಲೆ ಮಗಾ.. ದಾಯೆ ಜಾಲ್‌ಡ್ ಜೆಪ್ಪುವರ್ ಪನ್ದ್ ಪನ್ಪಿನ ಕೇನುಂಡು… ಆತ್ ಅಜ್ಜಿ. ಪನಿಯರನೆ ತಡ..! ನಾಲ್ ಜನಲ ಇಲ್ಲದ ಉಲಯಿ ಪೊಗ್ಗುದು ಆತ್ಂಡ್..!! ಇಲ್ಯ ಇಲ್ಲ್.. ಸುತ್ತ ತಟ್ಟಿದ ಗೋಡೆ.. ಒಂಜಿ ಕೊಣೆ ಅವುಲ ತಟ್ಟಿ ಕಟ್ಟಿನ.. ಒಂಜಿ ಲಾಟನ್ ಪೊತ್ತದ್ ನಡುತ ಕಂಬೊಗು ತೂಕುದೆರ್..‌ ಲಾಟನ್‌ದ ಬೊಲ್ಪುಗು ತೂನಗ.. ಅಜ್ಜಿ ಒಂಜಿ ಮೂಲೆಡ್ ಮುಸುಕು ಪೊದೆತ್‌ದ್ ಬೆರಿ ಪಾಡ್ದ್ ಕುಲೊಂದೆರ್… ಅಲ್ಪರ್ದೇ ಅಜ್ಜಿ ಪನ್ಪೆರ್… ಅಲ್ಪನೆ ಜೆಪ್ಪುಲೆ ಮಗಾ… ಇಪ್ಪುನು ಒಂಜೇ ಕೋಣೆ.. ಅವೆಡ್ ಎನ್ನ ಪುಳ್ಳಿ ಜೆತೊನ್ನುವಳ್.. ನಿಕುಲು ಎಡ್ಡೆ ಗುಣತ ಜೋಕುಲುಂದ್ ಎಂಕ್ಕ್ ಆಂಡ್.. ಅಂಚ್ಚ ನಿಕುಲೆನ್ ಇಲ್ಲದ ಉಲಯಿ ಲೆತ್ತೆ.. ನನ ಲಾಟನ್ ತೆಕ್ಕದ್ ಜೆಪ್ಪುಲೆ ಮಗ ಪನ್ದ್ ಅಜ್ಜಿ ಅಲ್ಪನೆ ಜೆತ್ತೊನುವೆರ್… ನಾಲ್ ಜನಲ ನೆಲಕ್ ಕುಂಟು ಪಾಡ್ದ್ ಲಾಟನ್ ತೆಕ್ಕದ್ ಜೆತ್ತೊನುವೆರ್… ಆಂಡ ನಾಲ್ ಜನಕ್ಲ ನಿದ್ರೆ ಬರ್ಪುಜಿ..! ಕಾರಣ.. ಆ ಪೊಣ್ಣು ಜೆತ್ತಿನ ಕೋಣೆರ್ದ್.. ಮಲ್ಲಿಗೆದ ಘಮ ಘಮ ಪರಿಮಳ ಬರೊಂದುಂಡು… ಆ ಪರಿಮಳಗ್ ಈ ಜವನೆರೆ ಮನಸ್ಸ್ ಅಲ್ಲೋಲ ಕಲ್ಲೋಲ ..

ಸಾಧಾರಣ ಪದ್ರಾಡ್ ಗಂಟೆ ಆವು.. ಚೇತು ಎಚ್ಚರ ಆದ್ ಮೆಲ್ಲ ಸುತ್ತ ತೂಪೆ.. ಮೂಜಿ ಜನೊಕ್ಲ ಎಡ್ಡೆ ನಿದ್ರೆ.. ಅಜ್ಜಿನಂಚ್ಚಿ ತೂಪೆ.. ಅಜ್ಜಿ ಗೊರಕೆ ಒಯ್ತೊಂದುಂಡು….

ಚೇತುಗು ಉಲಯಿ ಜೆತ್ತಿನ ಪೊಣ್ಣನ್ ಪತ್ತೊಡುಂದು ಆಸೆ.. ಆಯಿನ ಆಪುಂಡು ಪೋದು ಪೊಣ್ಣನ್ ಪತ್ತುನೆನೇ ಪನ್ದ್. ಮೆಲ್ಲ ಲಕ್ಕ್‌ದ್ ಕುಲ್ಲುವೆ.. ಸಬ್ದೊ ಆವಂದಿಲೆಕ್ಕ ಮೆಲ್ಲನೆ ಪರತೊಂದು ಕೋಣೆದ ಉಲಯಿ ಸೇರೊನುವೆ… ತಿಗಲೆಡ್ ಪೋಡಿಗೆ.. ಓಲ ಪೊಣ್ಣು ಬೊಬ್ಬೆ ಪಾಡ್ಯಲ್ಂಡ.. ಇಡೀ ಗೊತ್ತಾವು.. ಗೊತ್ತಾಂಡ ಎನ್ನ ಮರ್ಯಾದಿಯೇ ಪೋವುಂದು. ಅಲ್ಪನೆ ಆಲೋಚನೆ ಮಲ್ಪುವೆ… ಪೊಣ್ಣನ್ ತೂನಗ ಆಸೆಲ ಆಪುಂಡು.. ಬಾಕಿದಕ್ಲೆನ್ ತೂನಗ ಪೋಡಿಗೆಲ ಆಪುಂಡು.. ಅಲೋಚನೆ ಮಲ್ಪುನಗ ಪೊಣ್ಣು ಮೆಲ್ಲ ನರಕ್‌ದ್ ತಿರ್ಗ್‌ದ್ ಜೆತ್ತಿಲೆಕ್ಕ ಆಂಡ್ ಕಾರ್ದ ಗೆಜ್ಜೆ ಗಿಲಿ ಗಿಲಿಂದ್ ಸಬ್ದೊ ಮಲ್ತ್ಂಡ್ … ಕೋಣೆ ಇಡೀ ಮಲ್ಲಿಗೆದ ಪರಿಮಳ..! ಚೇತುಗು ತಾಳ್ಮೆ ಕಡಿದ್. ಮೆಲ್ಲನೆ ಪೊಣ್ಣು ಜೆತ್ತಿನಾಡೆ ಪೋಪೆ..! ಕೈಟ್ ಪರಡ್‌ದ್ ತೂಪೆ.. ಅಯನ ಕೈಕ್ ಪೊಣ್ಣನ ಕಾರ್ ತಾಗುಂಡು..! ಕಾರ್‌ನ್ ಮೆಲ್ಲ ಪೂಜುವೆ..! ಆಹಾ… ಏತ್ ಪೊರ್ಲುದ ಪಾದ..! ಕಾರ್‌ದ ಪಾದೊನು ಚೇತು ಪೂಜಿನಗ ಆ ಪೊಣ್ಣು ಒವ್ವೇ ತಡೆ ಮಲ್ಪಂದಿನ ಚೇತುಗು ಬೊಕ್ಕಲ ದೈರ್ಯ ಆಂಡ್… ಮೆಲ್ಲನೆ ಪೊಣ್ಣನ ಕೈತ್ತಲ್ ಜಾರ್‌ದ್ ಜೆತ್ತೊಂಡೆ… ಆಲೆನ ಮೈಯಿರ್ದ್ ಮಲ್ಲಿಗೆದ ಪರಿಮಳ ಜೋರಾದ್ ಆದ್ ಬರೊಂದುಂಡು.. ಆ ಪರಿಮಳಗ್ ಚೇತುಗು ತರೆಬೇನೆ ಆವರೆ ಸುರು ಆಂಡ್… ಆ ಅಮಲ್‌ಡೇ ಪೊಣ್ಣನ್ ಗಟ್ಟಿ ತರ್ಕ್‌ದ್ ಪತೊನುವೆ…

ಪೊಣ್ಣು ನಿದ್ರೆಡ್ ಚೇತು ಪತೊಂದಿನವೇ ಗೋಚರ ಇಜ್ಜಂದೆ.. ತಿರ್ಗ್‌ದ್ ಜೆತ್ತ್‌ದ್ ಚೇತುನು ಗಟ್ಟಿ ಪತೊನುವಳ್..!!

ಪಿದಾಯಿ ಜಗಲಿಡ್ ಜೆತ್ತಿನ ಸೀನಗ್. ಬೊಡೆದಿನ ನೆನೆಪಾದ್ ನಿದ್ರೆ ಬರಂದೆ ಲಕ್ಕ್‌ದ್ ಕುಲೊಂದು. ಬಚ್ಚಿರೆದ ಚೀಲೊನು ದೆತ್ತ್‌ದ್ ಬಚ್ಚಿರೆ ತಿನರೆ ಸುರು ಮಲ್ಪುವೆ…

ಉಲಯಿ ಜೆತ್ತಿನ ಮೂಜಿ ಜನೊಕ್ಲ ಕೋಣೆಡ್ ಜೆತ್ತಿನ ಮಿತ್ತ್ ಆಸೆ.. ಆಂಡ ಒರ್ಯದೊರಿಯಗ್ ಗೊತ್ತಾವರೆ ಬಲ್ಲಿ ಪನ್ದ್ ಪುಡೆರೊಂದುಲ್ಲೆರ್…

ರವಿ ಮೆಲ್ಲ ಲಕ್ಕ್‌ದ್ ಕುಲ್ಯೆ.. ಸುತ್ತ ತೂಪೆ ಮಾತೆರ್ಲ ಗೊರಕ್ಕೆ ಒಯ್ತೊಂದುಲ್ಲೆರ್… ಮೆಲ್ಲ ಲಕೊಂದು ಕೋಣೆದ ಉಲಯಿ ಪೊಗ್ಗುವೆ… ಒಂಜಿ ಮೂಲೆಡ್ ಪೊಣ್ಣು ಜೆತ್ತಿನ ತೋಜುಂಡು… ಸೀದ ಪೊಣ್ಣನ ಕೈತಡೆ ಪೋಪೆ… ಪೊಣ್ಣು ಎಚ್ಚರಿಕೆಡುಲ್ಲಲ್..! ರವಿಗ್ ತಿಗಲೆ ಒರೊನೆ ಜುಮ್ಮ ಆಂಡ್.. ಇತ್ತೆ ಪೊಣ್ಣು ಬೊಬ್ಬೆ ಪಾಡ್ವಳ್ .. ಪನ್ದ್ ಪಿರ ಪಿರ ಜಾರೊಂದು ಬನ್ನಗ .. ಪೊಣ್ಣು ಲಕ್ಕ್‌ದ್ ಕುಲ್ಲುದು. ರವಿನ್ ಕೈ ಬಾಸೆಡ್ ಲೆಪ್ಪುವಳು..!! ರವಿಗ್. ಉಂದು ಕನನಾ..!!? ಅತ್ತ್ ನಿಜನಾಂದ್. ಕೈ ಕಿನ್ಕ್‌ದ್ ತೂವೊನ್ವೆ.. ಪೊಣ್ಣನ ಮೈತ ಮಲ್ಲಿಗೆದ ಪರಿಮಳಗ್ ಮರ್ಲಾದ್. ಅಳೆನ ಕೈತಲ್ ಪೋಪೆ.. ಪೋದು ಅಳೆನ್ ತರ್ಕ್‌ದ್ ಪತೊನುವೆ… ಪೊಣ್ಣುಲ ಅಯನ್ ತರ್ಕ್‌ದ್ ಪತೊನುವಳ್….

ಇಂಚ್ಚ ಒರಿಯಗೊರಿ ನಾಲ್ ಜನೊಲ ಪೊಣ್ಣನ ಕೈತಲ್. ಪೋಯೆರ್..

ಚೇತು..ಪೊಣ್ಣಗ್ ಮುತ್ತು ಕೊರ್ಯರೆಂದ್. ಅಲೆನ ಕೆನ್ನೆಗ್ ಬಗ್ಗ್‌ದ್ ಮುತ್ತು ಕೊರ್ಪೆ.. ಕೊರ್ನಾಯೆ ಒರೊನೆ ಅಲ್ಕ್‌ದ್ ಬೂರ್ವೆ..! ಗೆಂಡಗ್ ಮುತ್ತು ಕೊರ್ಲೆಕ್ಕ ಆಂಡ್ ಆಯಗ್… ಬಾಯಿ ಕರೆಂಚಿನ ಅನುಭವ .. ಅಲೆರ್ದ್ ದೂರ ಜಾರ್ಯರೆ ತೂಪೆ… ಆಂಡ ಪೊಣ್ಣು ಪತೊನ್ನ. ಕರ್ಬೊದ ಕೈಟ್ ಪತೊನಿಲೆಕ್ಕ ಆಂಡ್..! ಪುಡೆರುವೆ.. ಬೊಬ್ಬೆ ಪಾಡರೆ ತೂಪೆ.. ಸ್ವರೊನೇ ಇಜ್ಜಿ..!!

ರವಿಗ್ಲ ಆಸೆಡ್ ಪೊಣ್ಣನ ಮಿತ್ತ್ ಬೂರ್ನಗ ಒವ್ವೊ ಪಾದೆ ಕಲ್ಲ್‌ಗ್ ಬೂರಿಲೆಕ್ಕ ಆದ್. ಮೈ ಇಡೀ ಬೇನೆ ಸುರು ಆಪುಂಡು… ಪೋಡಿಗೆಡ್ ಪುಡೆರ್ದ್ ಲಕ್ಕರೆ ತೂಪೆ.. ಆಂಡ ಲಕ್ಕರೆ ಆಪುಜಿ..!!

ರಾಘುಲ ಪೊಣ್ಣನ್ ಪತ್ತರೆ ಪೋದು ಮೈ ಇಡೀ ಉರಿಯುನೆಡ್ ಪುಡೆರೆಂದು ಉಲ್ಲೆ.. ದೀಚುಗು ಮೈ ಸೂ ಬರ್ಪಿನೆಡ್ ಮತಿಯೇ ತತ್ತ್‌ದ್ ಪೋಂಡು.. ನಾಲ್ ಜವನೆರ್ಲ ಪೊಣ್ಣನ ಆಸೆಗ್ ಪೊದು. ನರಳೊಂದುಲ್ಲೆರ್..

ಸೀನೆ ಮಾತ್ರ ಜಗಲಿಡ್ ಒರಿಯೆ.. ಸೀನಗ್ ಜಾಲ್‌ಡ್ ಏರೋ ಆಂಜಿಲೆಕ್ಕ ಆಂಡ್.. ಟಾರ್ಚ್ ಲೈಟ್ ಪಾಡ್ದ್ ತೂಪೆ.. ಬರಬರಂದ್ ಸಬ್ದೊ ಆಂಡ್.. ಓಲಾ ಪೆರ್ಗುಡೆ ಬಲಿತಿನೆ ಆದಿಪ್ಪುಂದು ಎನ್ನಿದ್. ಆಡೆಗೆ ಜಾರ್ದ್ ಜೆತ್ತೊನುವೆ… ಚೂರು ಪೊರ್ತು ಆನಗ. ಸೀನಗ ಚಳಿ ಗಾಳಿ ಬೀಜುಂಡು.. ಮೈ ಕೋಡರೆ ಸುರು ಆಂಡ್.. ಕುಂಟು ಮುಚ್ಚ ಪಾಡೊನುವೆ… ಏರೋ ಇಲ್ಲದ ಉಲಯಿಡ್ದ್ ಜಾಲ್ ಜತ್ತ್‌ದ್ ಪೋಯಿಲೆಕ್ಕ ಆಂಡ್.. ಲಕ್ಕ್‌ದ್ ಕುಲ್ಲುದು ತೂಪೆ…

ಅಜ್ಜಿ ಜಾಲ್‌ಡೆ ಪೋಪಿಲೆಕ್ಕ ತೋಜಿಂಡ್..

ಭಗವತಿನ್ ಎನ್ನೊಂದು. ಸ್ವಾಮಿ ಅಪ್ಪೆ ಪನ್ದ್.. ಸೀನೆ ನಿದ್ರೆಗ್ ಜಾರುವೆ…

ಕಕ್ಕೆದ ಸ್ವರೊ .. ಪಕ್ಕಿಲೆ ಸೊರ ಕೇನ್ನಗ ಸೀನಗ್ ಎಚ್ಚರ ಆಪುಂಡು.. ಎಚ್ಚರ ಆದ್ ತೂಪೆ.. ಆಯೆ ಒವ್ವಾ ಗಂಡಿಡ್‌‌ ಜೆತ್ತೊಂದೆ..!! ಆಶ್ಚರ್ಯ !!! ಎಲಾ ಯಾನ್ ಕೋಡೆ ಮುಲ್ಪ ಇತ್ತಿನ ಜಗಲಿಡ್ ಜೆತ್ತಿತ್ತೆ… ಎನನ್ ಏರ್ ಈ ಗಂಡಿಗ್ ಕನತ್ ಜೆಪ್ಪದಿನೆಂದ್.. ಲಕ್ಕ್‌ದ್ ಸುತ್ತ ತೂಪೆ.. ಕೋಡೆ ರಾತ್ರಿದ ಇಲ್ಲೇ ಇಜ್ಜಿ..!! ಅಯ್ಯೋ ಭಗವತಿ.. ಉಂದು ದಾದ ಕತೆ.. ಕೋಡೆ ತೂಯಿನ ಇಲ್ಲೇ ಇಜ್ಜಿ..! ಗಂಡಿರ್ದ್ ಮಿತ್ತ್ ಬಡ್ತ್‌ದ್ ಸುತ್ತ ತೂಪೆ.. ಅವೊಂಜ್ಜಿ ಜರಿದ್ ಬೂರಿನ ಇಲ್ಲ್.. ಮಣ್ಣ್‌ದ ಗೋಡೆಲು ಬೂರ್ದು ಪುಂಚೊಲು ಆತೊ… ಆಂಡ ಎನ್ನೊಟ್ಟುಗು ಬತ್ತಿನ ಜವನೆರ್ ಓಲೆರ್ಂದ್ ನಾಡೊಂದು ಪೋಪೆ.. ಪೋನಗ ರವಿ ಒಂಜಿ ಮರತ್ತ ಎಡೆಟ್ ಬೂರ್ದ್ ತಿಕೊಂದು ಮತಿ ಇಜ್ಜಂದೆ ನೇಲೊಂದುಲ್ಲೆ ..

ಕೋಡೆ ತೂಯಿನ. ಇಲ್ಲ್‌ಲ ಇಜ್ಜಿ… ಪೊಣ್ಣುಲ ಇಜ್ಜಿ.. ಜಾಲ್‌ಲ ಇಜ್ಜಿ..!! ಮೊಕ್ಲೆನ ಗಂಟ್ ಮೂಟೆ ಮಾತ. ಬಲ್ಲೆದ ರಾಶಿಡ್ ಉಂಡು… ಚೂರು ದುಂಬು ಪೋದು ತೂನಗ ಚೇತು , ದೀಚು, ರಾಘ, ಒಂಜಿ ಪಾದೆದ ಎಡೆಟ್ ಬೂರೊಂದೆರ್…

(ಮುಂದುವರಿಯುಂಡು )

( ನಿಮ್ಮ ಅನಿಸಿಕೆ ಅಭಿಪ್ರಾಯಕ್ಕೆ ಸ್ವಾಗತ.. ಒಂದು ಬರಹಗಾರನನ್ನು ಮತ್ತೂ ಬರೆಯುವಂತೆ ಹುರಿದುಂಬಿಸುದು ನಿಮ್ಮ ಅಮೂಲ್ಯವಾದ ಅನಿಸಿಕೆ ಅಭಿಪ್ರಾಯಗಳು ಮಾತ್ರ…)

Copyright Disclaimer under section 107 of the Copyright Act 1976, allowance is made for “fair use” for purposes such as criticism, comment, news reporting, teaching, scholarship, education and research. Fair use is a use permitted by copyright statute that might otherwise be infringing.