ಮಾಯೊದ ಪುಣ್ಣಮೆ: ಕಥಾ ಧಾರಾವಾಹಿ | ಭಾಗ-೧

ಮಾಯೊದ ಪುಣ್ಣಮೆ: ಕಥಾ ಧಾರಾವಾಹಿ | ಭಾಗ-೧

ಪೊರ್ತು .. ಬಯ್ಯ ಆಂಡ್… ಊರುದ ಎದುರುಡೊಂಜ್ಜಿ ಗುಡ್ಡೆ… ಗುಡ್ಡೆದ ಕೊಡಿಟೊಂಜಿ ಒಂಟಿ ಗೋಲಿದ ಮರ.. ಈ ಗುಡ್ಡೆಡ್ ಉಂತ್ತುದು ಸುತ್ತ ತೂಂಡ ನಾಲೂರುಲ ತೋಜುಂಡು.. ತರತರೊದ ಪಕ್ಕಿಲು ಈ ಗೋಲಿದ ಮರಟ್ ಉಪ್ಪುವೊ… ಈತ್ ಪೊರ್ಲುದ ಜಾಗೆ ಆಂಡಲ ಇಡೆ ಜನ ಬರ್ಯರೆ ಪಿರ ಜಾರುವೆರ್.. ! ಕಾರಣ.. ರಡ್ ಜನ ಕಂಡನಿ ಬೊಡೆದಿ. ಉಂದ್ವೇ ಗೋಲಿದ ಮರಕ್ ಬಲ್ಲ್ ದೆತೊಂದು ಸೈತ್‌ದೆರ್.. ಅಕ್ಲೆ ಆತ್ಮೊಲು ಆ ಜಾಗಡೇ ಸುತ್ತು ಬರ್ಪಿನೆರ್ದಾವರ ಆಡೆ ಏರ್ಲ ಬರ್ಪುಜೆರ್.. ಪಗೆಲ್ ಓಲಾಂಡಲ ಕನಕ್‌ಗ್ ಬತ್ತೆರ್ಂಡಲ ಅಕ್ಲೆನ ಕಣ್ ಕಟ್ಟದ್. ಸಾದಿ ತಪ್ಪದ್ ಬುಡ್ಪುಂಡು… ಕತ್ತಲೆಗ್ ಆ ಸಾದಿಡೆ.. ತರೆ ಇಜ್ಜಾಂದಿನ ಮೃಗೊಕುಲು ತೋಜುವೊ.. ಅಂಚ್ಚಾದ್ ಊರುದ ಜನೊಕ್ಲು.. ಈ ಗುಡ್ಡೆಗ್ ಬರ್ಪುನೆನೇ ಉಂತ್ತದೆರ್… ರಾತ್ರಿ ಆಂಡ ಯಾವು ಆ ಗೋಲಿದ ಮರಡ್ದ್ ವಿಕಾರ ಸ್ವರೊಕ್ಲು ಕೇನೊಂದುಪ್ಪುಂಡು..

ಆನಿ ಅಮಾವಾಸ್ಯೆ. ಬೇತೆ.. ಪತ್ತ್ ಗಂಟೆ ರಾತ್ರಿ. ಸುತ್ತ ಊರುದ ಲೈಟ್ ಮಾತ್ರ ತೋಜೊಂದುಂಡು.. ಮೊರೊನಿದ ಸ್ವೊರೊ ವಿಕಾರೊಡು ಕೇನೊಂದುಂಡು… ಉಂದ್ವೇ ಗೋಲಿದ ಮರತ ಮುದೆಲ್‌ಗ್ ರಡ್ಡ್ ಬೈಕ್ ಬತ್ತ್‌ದ್ ಉಂತುಂಡು… ರಡ್ಡ್ ಬೈಕ್‌ರ್ದ್ ನಾಲ್ ಜನ ಬತ್ತ್‌ದ್ ಜತ್ತೆರ್.. ಒಂಜಿ ಕ್ಯಾಂಡಲ್ ಪೊತ್ತದ್ ಸುತ್ತ ಕುಲ್ಲುದು ಬನ್ನಗ ಕನತಿನ ಪ್ಲಾಸ್ಟಿಕ್ ಬ್ಯಾಗ್‌ರ್ದ್ ನಾಲ್ ಬಾಟ್ಲಿ ದೆತ್ತ್ ಎದುರು ದೀಯೆರ್… ಅವ್ವು ಅವ್ವೇ ಊರುದ ಜವನೆರ್ ಅಕ್ಲೆ ನಾಲ್ ಜನತ ಒಂಜಿ ಗುಂಪು.. ದೀಚು, ರವಿ, ರಾಘ, ಚೇತು, ಇಂಚ್ಚ ನಾಲ್ ಜನ… ಒವ್ವೊ ವಿಷಯೊನು ಪಾತೆರ್ಯರೆ. ಪಾತೆರೊಂದು ಪಾರ್ಟಿ ಮಲ್ಪರೆ ಈ ಗುಡ್ಡೆದ ಗೋಲಿದ ಮರತ ಮುದೆಲ್‌ನ್ ಆಯ್ಕೆ ಮಲ್ತೊಂದೆರ್… ಒರಿ ಗ್ಲಾಸ್‌ಲೆನ್ ಸಾಲ್ ದೀಪೆ.. ಬೊಕ್ಕೊರಿ ಒಂಜಿ ಬಾಟ್ಲಿ ಓಪನ್ ಮಲ್ತ್ ಮಾತ ಗ್ಲಾಸ್‌ಗ್ಲ ದಾಂಗವೆ.. ಚಿಯರ್ಸ್ ಪಂಡ್‌ದ್ ಪರ್ಯರೆ ಸುರು ಮಲ್ಪುವೆರ್..‌

ರವಿ ಪರೊಂದು ಪನ್ಪೆ.. ಓಂಡು ಮಾರಾಯ ಕಬಾಬು..? ಕನತ್‌ಜನಂದ್ ಕೇನ್ನಗ.. ಚೇತು ಬೈಕ್‌ದ ಬಾಕ್ಸ್‌ಡ್ ದೀನ ಕಬಾಬುದ ಪ್ಯಾಕ್‌ನ್ ಕನತ್‌ದ್. ಕ್ಯಾಂಡಲ್‌ದ ಎದುರು ಬಿಚ್ಚವೆ… ಪ್ಯಾಕ್ ಬಿಚ್ಚನಗ ಒರೊನೆ ವಾಸನೆ ಬರ್ಪುಂಡು..! ಆ ವಾಸನೆಗ್ ಪರ್ನವುಲ ಕಕ್ಕ್‌ದ್ ಪೋವು ಅಂಚ್ಚ ಬರೊಂದು ಇತ್ತ್ಂಡ್… ಪ್ಯಾಕ್ ಓಪನ್ ಮಲ್ತ್ ತೂನಗ ಕನತಿನ ಕಬಾಬು ಕುರಿದ್ ಮುದ್ದೆ ಆತ್ಂಡ್… ಅವೆನ್ ತೂದು ದೀಚು ನೆರ್ಪೆ.. ಎಂಚ್ಚಿನ ಮಾರಾಯ ನಿನ್ನ ಕರ್ಮ.. ಕಬಾಬು ಪಂಡ್‌ದ್ ಕೋರಿದ ಕುರಿದಿನ ಪೊಟ್ಟೆನ್ಲ ತುಂಬೊಂದು ಬತ್ತ್‌ದತ್ತಾ..? ನಿಕ್ಕ್ ಸೊಯೊ ಉಂಡಾಂದ್ ನೆರ್ನಗ.. ಚೇತು ಪನ್ಪೆ. ಇಜ್ಜಿ ಮಾರಯ ಗೂಡುದಾಯೆ ಕಬಾಬ್ ಕಟ್ಟ್‌ದ್ ಎನ್ನವೇ ಕೈಟ್ ಕೊರ್ತಿನಿ.. ಉಂದ್ವೇ ಬ್ಯಾಗ್ಡ್ ಪಾಡ್ದ್ ಕೊರ್ತೆಂದ್ ಪನ್ಪೆ.. ನಿಕ್ಕ್ ಕೋಡೆದ ಬಿರಿತ್‌ಜಿ.. ಪನ್ದ್ ರವಿ ಆ ವಾಸನೆ ಬರ್ಪಿನ ಕಟ್ಟ್‌ನ್ ಒಯ್ತ್‌ದ್ ದೂರ ಬಲ್ಲೆಗ್ ದಕ್ಕುವೆ… ಕಬಾಬು ಬೋಡಿತ್ಂಡ ಎಲ್ಲೆ ತಿನ್ಕ.. ಇತ್ತೆ ಎಲ್ಲೆದ ಬಗ್ಗೆ ಪಾತೆರುಗ.. ಎಲ್ಲೆ ನಮ ಪೋಪಿನ ಜಾಗ ಭಾರಿ ಕಷ್ಟದ ಜಾಗ.. ಅವೆಕ್ ಏರಾಂಡಲ ಒರಿ ಗೊತ್ತಿತ್ತ್‌ನಾಯೆ ಒಟ್ಟಿಗೆ ಬೋಡು ಪನ್ಪೆ… ನಿಕ್ಲೆಗ್ ಗೊತ್ತಿತ್ತ್‌ನೆಡ್ ಏರಾಂಡಲ ಉಲ್ಲೆರಾ..? ಪನ್ದ್ ಕೇನುವೆ.. ರಾಘು ಚೂರು ಯೋಚನೆ ಮಲ್ತ್‌ದ್ ಪನ್ಪೆ.. ನಮ ಪೋಪಿನ ಜಾಗ ಇಲ್ಯ ಮಲೆ.. ಅಡೆಗ್ ಪೋದು ಅಲ್ಪದ ವಿಷಯ ಗೊತ್ತಿಪ್ಪುನು ನಮ್ಮ ಸೀನಣ್ಣಗ್ ಮಾತ್ರ .. ಅರೆನ್ ನಮ ಪತೊಂಡ ನಮ್ಮ ಕೆಲಸ ಸುಲಬೊಡು ಆವುಂದು ಪನ್ಪೆ.. ಮಾತೆರ್ಲ ಆವುಂದು ಒತ್ತೊನುವೆರ್… ಪಾತೆರ್ ಪಾತೆರ್ದ್ ಬಾಟ್ಲಿ ಸಿಗರೇಟ್ ಕಾಲಿ ಮಲ್ತ್‌ದ್. .. ಎಲ್ಲೆ ಸೀನಣ್ಣನ್ ತೂವರೆ ಪೋಯಿಂದ್ ಬೈಕ್ ಸ್ಟಾರ್ಟ್ ಮಲ್ತ್ ಊರುಗು ಬರ್ಪೆರ್….

ಶೀನೆ ಇಲ್ಲದ ಜಗಲಿಡ್ ಕುಲೊಂದು ಬಜ್ಜೈ ಪೆರೊಸೊಂದು ಉಪ್ಪುನಗ ಆಯನ ಇಲ್ಲದ ಬೇಲಿದ ಆಪೆಡ್ ರಡ್ ಬೈಕ್ ಉಂತ್ತುಂಡು .. ಅಯೆರ್ದ್ ನಾಲ್ ಜವನೆರ್ ಜತ್ತ್‌ದ್ ಮುಳ್ಳುದ ಪಡಿ ಗೇಟ್‌ನ್ ಜಾರದ್. ಶೀನನಂಚ್ಚಿ ಬರೊಂದುಲ್ಲೆರ್.. ತೂನಗ ಅವು ಶೀನನ ಗುರ್ತದ ಜವನೆರ್ .. ಶೀನನ್ ತೂದು ನಮಸ್ಕಾರ ಕೊರ್ಪೆರ್.. ಬತ್ತ್‌ದ್ ಶೀನನ ಕೈತಲ್ ಕುಲ್ಲುದು. ಶೀನಣ್ಣ ಈರೆಡ್ದ್ ಒಂಜಿ..ಮಲ್ಲ ಉಪಕಾರೊ ಆವೊಡಾಂಡ್.. ಈರ್ ಬಲ್ಲಿಂದ್ ಪನರೆ ಬಲ್ಲಿ.. ಅವೆಕ್ ಆಪಿನ ಕಾಸ್ ಎಂಕ್ಲು ಕೊರ್ಪೊಂದ್ ಪನ್ನಗ.. ದಾದ ಎನರ್ದ್ ಕೆಲಸ ಆವೊಡುಂದು ಕೇನ್ವೆ.. ದಾಲಜ್ಜಿ ಸೀನಣ್ಣ.. ಎಂಕ್ಲೆಗ್ ಇಲ್ಯ ಮಲೆತ ಸರಿ ಸಾದಿನ್ ತೋಜಾದ್ ಕೊರೊಡು.. ಈರೆಗಾಂಡ ಅಲ್ಪ ಮಾಹಿತಿ ಗೊತ್ತುಂಡು.. ಅವೆಕ್ ಈರೆನ್ ನಾಂಡೊಂದು ಬತ್ತಿನೆ ಪನ್ನಗ ಸೀನೆ ಅಕ್ಲೆನವೇ ಮೋನೆ ತೂಪೆ… ಇಲ್ಯ ಮಲೆ ಅವು ಸಾದಾರಣದ ಮಲೆ ಅತ್ತ್.. ಏತೋ ಜೀವೊಲು ಬಾಯಿಗ್ ನೀರಿಜ್ಜಂದೆ ಸೈತ್ತಿನ ಜಾಗ ಅವು.. ಆಡೆಗ್ ಈ ಜವನೆರ್ ಪಿದಾಡ್ದೆರ್ ಪಂಡ .. ದಾದನೋ ವಿಷಯ ಉಪ್ಪೊಡು.. ಪೊಕ್ಕಡೆ ಪಿದಾಡಯೆರ್… ಪನ್ದ್ ಅಲೋಚನೆ ಮಲ್ಪುವೆ.. ಅಯೆ ಮೌನಡ್ ಆಲೋಚನೆ ಮಲ್ಪುನ ತೂದು.. ರವಿ ಪನ್ಪೆ .. ಅಣ್ಣಾ ಈರ್ ಏರೆಡಲ ಪನರೆ ಬಲ್ಲಿ. ನಮ ಇಲ್ಯ ಮಲೆಟ್ ವಜ್ರದ ಕಲ್ಲ್ ಒಕ್ಕರೆ ಎಂಕ್ಲು ಪಿದಾಡ್ದಿನಿ..ಈರೊಂಜಿ ಆ ಜಾಗನ್ ತೋಜಾದ್ ಕೊರ್ಲೆ.. ಬೊಕ್ಕ ಇರೆಗ್ ಇಂಚ್ಚಿ ಬರೊಲಿ… ಈರೆಗ್ ಆಪಿನ ಕಾಸ್ ಏತ್ಂದ್ ಪನ್ಲೆ ಅವೆನ್ ಎಂಕ್ಲು ಇತ್ತೆನೆ ಕೊರ್ಪೊಂದು ಪನ್ಪೆ… ಸೀನೆಲ ಬಂಗಡ್ ಇತ್ತಿನಾಯೆ.. ಅಯನ ಬೊಡೆದಿಲ ಬಂಜಿನಾಳ್ ಮಾತಲ ಖರ್ಚಿದ ಸಾದಿಲೇ ಉಪ್ಪುನಗ ದುಡ್ಡು ಬೋಡಾಪುಂಡು.. ಮೊಕ್ಲೆಡ ಆಪುಜಿಂದ್ ಪಂಡ. ಕೈಕ್ ಬರ್ಪಿನ ದುಡ್ಡುಲ ಪೋವು… ಒರ ತಾದಿ ತೋಜಾವರೆ ಅತ್ತಾ.. ಬೊಕ್ಕ ಅಕ್ಲು ದಾದ ಬೋಡಾಂಡಲ ಮಲ್ಪಡ್.. ಎಂಕ್ಕ್ ಸಂಬಂಧ ಇಜ್ಜಿ.. ಪನ್ದ್ ಯೋಚನೆ ಮಲ್ತ್‌ದ್ ಕಡೆಕ್ ಪನ್ಪೆ.. ಒಯ್ಕ್‌ಲ ಎನ್ನ ಬೊಡೆದಿಡ ಒಂಜಿ ಪಾತೆರ ಕೇನೊನುವೆ.. ಆಳ್ ಆವು ಪಂಡಲ್ಂಡ ಬರ್ಪೆ ಪನ್ದ್ ಇಲ್ಲದ ಉಲಯಿ ಪೋಪೆ. ಬೊಡೆದಿಡ ವಿಷಯ ಪನ್ಪೆ .. ಆಲ್‌ಲ ನನ ನಮಕ್ ದುಡ್ಡು ಬೋಡಾಪುಂಡತ್ತೇ.. ಬತ್ತಿನ ಕೆಲಸೊನು ದಾಯೆ ಬುಡ್ಪುನು ಆಂಡ ಈರ್ ಅಕ್ಲೆಗ್ ತಾದಿ ತೋಜಾದ್ ಬರೊಡು .. ಬೊಕ್ಕ ಅಕ್ಲೆನ ಒಯ್ವಾಟ್ ನಮಕ್ ಬೊಡ್ಚಿಂದ್ ಪನ್ಪಲ್… ಸೀನೆ ಇಲ್ಲದ ಪಿದಾಯಿ ಬತ್ತ್‌ದ್ ಜವನೆರೆಡ.. ಕೆಲಸೊಗ್ ಬರ್ಪೆಂದ್ ಪನ್ಪೆ… ನಾಲ್ ಜವನೆರ್ಲ. ಕಿಸೆರ್‌ದ್ ಕಾಸ್ ದೆತ್ತ್‌ದ್ ಒಟ್ಟು ಮಲ್ತ್. ಮೂಜಿ ಸಾವಿರೊನು ಸೀನನ ಕೈಟ್ ಕೊರ್ದು. ಸೀನಣ್ಣ ಉಂದು ಅಡ್ವಾನ್ಸ್.. ಇರೆಗ್ ಬೋಡಾವು ಅಯ್ಕಾದ್ ಮೂಜಿ ಸಾವಿರ ಇತ್ತೆ ಕೊರೊಂದುಲ್ಲೊ.. ನನ ಈರ್ನ ಕೆಲಸ ಆಯಿನ ಕೂಡ್ಲೆ ಕೊರ್ಪೊಂದು ಪಂಡ್‌ದ್‌‌. ಎಲ್ಲೆ ಬೊಲ್ಪುಗು ರಡಿಯಾದ್ ಉಂತ್ತುಲೆ ಈರೆನ್ ಲೆತೊಂದು ಪೋವರೆ ಬರ್ಪೊ… ಆಂಡ ಈ ವಿಷಯ ನಮ್ಮ ಉಲಯಿಡೇ ಉಪ್ಪಡ್ ಪನ್ದ್ ಪೋಪೆರ್… ಸೀನೆ ಕೈಟಿತ್ತಿನ ಮೂಜಿ ಸಾರೊನು ಕಣ್ಣ್‌ಗ್ ಒತ್ತೊಂದು ಇಲ್ಲದ ಉಲಯಿ ಪೋಪೆ…

(ಮುಂದುವರಿಯುಂಡು)

Copyright Disclaimer under section 107 of the Copyright Act 1976, allowance is made for “fair use” for purposes such as criticism, comment, news reporting, teaching, scholarship, education and research. Fair use is a use permitted by copyright statute that might otherwise be infringing.