ಮಾಯೊದ ಪುಣ್ಣಮೆ: ಕಥಾ ಧಾರಾವಾಹಿ | ಭಾಗ -6

ಮಾಯೊದ ಪುಣ್ಣಮೆ: ಕಥಾ ಧಾರಾವಾಹಿ | ಭಾಗ -6

ಕರಿವಾರೊದ :- { ಆಂಡ ಪುಚ್ಚೆದ ಮೋನೆಡ್ ದಾದನೋ ಬದಲಾವಣೆ ಆವೊಂದುಂಡು… !!

Www.goldfactorynews.com

ಪುಚ್ಚೆದ ಮೋನೇ ಚೂಪಾವೊಂದು ಬರೊಂದುಂಡು..!! }

ಚೇತು ಪೋಡಿಗೆಡ್ ಕುಲ್ಲಿನಲ್ಪರ್ದ್ ಲಕ್ಕುವೆ.. ಲಕ್ಕ್‌ದ್ ಉಂತ್ತುದು ತೂನಗ ಪುಚ್ಚೆದ ಕಣ್ ಕೆಂಪಾವೊಂದುಂಡು..!! ಮೈತ ರೋಮ ಮುಳ್ಳು ಪಂಜಿದ ರೋಮದಲೆಕ್ಕ ಆವೊಂದುಂಡು.. ಬಣ್ಣದ ಪುಚ್ಚೆ ವಿಕಾರೊ ರೂಪಡ್. ಮೊಕ್ಲೆನ್ ಗೆಡಪರೆ ತಯರಾಂಡ್…! ಮೂಜಿ ಜನಲ ಗುಡ್ಡೆರ್ದ್ ತಿರ್ತ್ ಬಲಿತೊಂದು ಬರ್ಪಿನೆನ್ ತೂಯಿನ ಸೀನಗ್ ಅಂದಾಜಿ ಆಂಡ್.. ಓಲಾ ಕಾಡ್ ಪಂಜಿ ಗೆಡತೊಂದು ಬರೊಂದುಂಡು ಮೊಕ್ಲೆನ್ಂದ್.. ಸೀನಣ್ಣಾ … ಪನ್ದ್ ಬೊಬ್ಬೆ ಪಾಡೊಂದು. ದೀಚು ಚೇತು ರವಿ ಬಲಿತೊಂದು ಬರೊಂದುಲ್ಲೆರ್… ರಾಘುಗು ಮೊಕ್ಲೆನ್ ತೂದು ಪೋಡಿಗೆಡ್ ಅಲ್ಪನೆ ಇತ್ತಿನ ಮರಕ್ಕ್ ಬಡ್ತೊಂಡೆ…

ಮೂಜಿ ಜನ ಬಲಿತೊಂದು ಬನ್ನಗ ಅಕ್ಲೆ ಪಿರಾವುಡೆ ದಾದನೋ. ವಿಕಾರ ರೂಪದ ಒಂಜಿ ಬರೊಂದುಂಡು… ತರೆನ್ ಆಡವೊಂದು ಬಲ್ಲೆದ ರಾಶಿನ್ ಪೊಲಿತೊಂದು ಗೊರ್ರ್… ಗೊರ್ರ್.. ಪನ್ದ್ ಶಬ್ದೊಡು ಬರೊಂದುಂಡು… ಮೂಜಿ ಜನಲ ಬಲಿತೊಂದು ಬತ್ತ್‌ದ್ ಸೀನನ ಪಿರವು. ಉಂತ್ತೊನುವೆರ್… ಆ ವಿಕಾರ ಆಕಾರೊನು ತೂನಗನೇ ಮೈ ಏರಿ ಪೋಪುಂಡು… ಉದ್ದ ನಾಲಯಿ. ಕೆಂಪು ಕಣ್.. ಪುಚ್ಚೆದ ಕೈತ ರೀತಿದ ಮಲ್ಲ ಕೈ…!

ಸೀನಗ್ ಉಂದು ಮಲೆಬೂತೊದವೇ ರೂಪಂದ್ ಆಂಡ್.. ಮನಸ್ಸ್‌ಡೆ ಮಲೆ ಚಾಮುಂಡಿ ದೈವೊನು ನೆನೆತ್‌ದ್ ಕಾರ್ದ ಬೆರೆಲ್‌ಡ್ ಪರೆಲ್ ಕಲ್ಲ್ ದೆತ್ತ್‌ದ್ ನಾಲ್ ದಿಕ್ಕ್‌ಗ್ ದಕ್ಕ್‌ದ್ ಪನ್ಪೆ… ಅಪ್ಪೇ ಮಲೆ ಚಾಮುಂಡಿ. ನಿನ್ನ ನಡೆಟ್ ಕಾಡ ನಡುಟು ಎಂಕ್ಲು ಉಲ್ಲ ಅಪ್ಪೆ… ಎಂಕ್ಕಾವಡ್ ಎನ್ನ ಒಟ್ಟುಗಿತ್ತಿ ಜವನೆರೆಗಾವರ್. ಏರೆಗ್ಲ ನಿನ್ನ ಗಣೊಕುಲೆಡ್ದ್ ತೊಂದರೆ ಆವಂದಿಲೆಕ್ಕ ಕಾಪುಲಪ್ಪೆ… ಊರುಗು ಪೋಯಿ ಬೊಕ್ಕ ನಿನ್ನ ಬನೊತ್ತ ಕಲ್ಲ್‌ಗ್ ತಾರಾಯಿ ನರಿಪುವೆ ಅಪ್ಪೆಂದ್ ಪರಕೆ ಪಂಡೊನುವೆ…

ಸೀನನ ನುಡಿ ಆತೆ ಆಯಿನಿ… ಒರೊನೆ ಆ ಆಕಾರ ಒಂಜಿ ಮಲ್ಲ ಮರನ್ ಪೊಲಿತ್‌ದ್ ಪುಡೆರೊಂದು ಪಿರ ಪಿರ ಪೋದು.. ದುಂಬುದ ಬಣ್ಣದ ಪುಚ್ಚೆಯಾದ್. ಮರಡ್ದ್ ಮರಕ್ಕ್ ಲಾಗಿಯೊಂದು ಪೋದು ಕಾಡ್‌ದ ಉಲಯಿ ಸೇರೊಂಡು… ಸೀನೆ ಆವು ಪೋಯಿನ ಜಾಗನ್ ತೂಪೆ.. ತೂನಗ ಅಲ್ಪಂಜಿ ಗಡಿಕಲ್ಲ್ ತೋಜುಂಡು.. ಅವೆನ್ ಜವನೆರೆಡ ತೋಜಾದ್ ಪನ್ಪೆ.. ಅಲೇ.. ನನಾಂಡಲ ಮರ್ಲ್ ಕಟ್ಟುನೆನ್ ಉಂತ್ತಲೆ.. ಅತ್ತಂಡ ಯಾನ್ ತಿರ್ಗ್‌ದ್ ಊರುಗು ಪೋಪೆಂದ್ ಪಂಡ್‌ದ್ ಗಡಿಕಲ್ಲ್‌ನ್ ತೋಜಾದ್. ಅವೆನ ಕಥೆ ಪನ್ಪೆ…

ತೂಲೆ ಅವು. ಈ ಕಾಡ್‌ಡ್ ದುಂಬುದಕ್ಲು ಪಾಡಿನ ಗಡಿಕಲ್ಲ್… ಮೂಲೆ ಪೋನಗ ಏತೋ ಜವನೆರೆನ್ ಕಣ್ಣ್ ‌ಗ್ ತೋಜುನ ಪೊರ್ಲುದ ಪ್ರಾಣಿಲೆಕ್ಕ ತೋಜಿದ್ ಅಕ್ಲೆನ್ ಮರ್ಲ್ ಕಟ್ಟಾದ್ ಈ ಮಲೆಬೂತೊಲು ಕೊನೊಪೊ… ಪೊರ್ಲುಗು ಮರ್ಲಾದ್. ಆ ಮೃಗೊತ ಪಿರವೇ ಪೋದು ಪೋದು. ಆ ಗಡಿ ಕಲ್ಲ್ ದಾಟಿಯೆರ್ಂಡ. ಅಕ್ಲು ಮಲೆಬೂತೊಲೆ ಕೈಕ್ ತಿಕ್ಕ್‌ದ್ ಸೈಪೆರ್.. ಕಡೆಕ್ ಅಕ್ಲೆ ಆತ್ಮೊಲು ಬೂತೊಲಾದ್. ಅಂಚ್ಚನೆ ಮಲ್ಪರೆ ಸುರು ಮಲ್ಪುವೊ… ಈ ಸಂಚಾರೊಗು ಒಂಜಿ ಬೇಲಿಂದ್ ಉಪ್ಪುನು. ಆ ಗಡಿಕಲ್ಲ್ ಮಾತ್ರ.. ದಾದನ ನಿಕ್ಲೆ ಅಪ್ಪೆ ಅಮ್ಮೆ ಮಲ್ತಿನ ಎಡ್ಡೆ ಕಾರ್ಯೊಡು ನಿಕ್ಲು ಬಚಾವು ಆಯರ್ .. ನನ ಅಂಚ್ಚ ಪೋವಡೆ… ಬಲೆ ಪೋಯಿ ಪನ್ದ್.. ದುಂಬು ಪೋಪೆ..

ಕತೆನ್ ಕೇಂಡಿನ ನಾಲ್ ಜನೊಕ್ಲ ಉಂದು ಆದಿಪ್ಪೊ. ಅತ್ತ್ ಸೀನೆ ಎಂಕ್ಲೆನ್ ಪೋಡಿಗೆ ಕಟ್ಟವರೆ ಪನ್ಪಿನೆನಾಂದ್ ಆಂಡ್.. ದಾಲ ಮನಿಪಂದೆ ಮಲ್ಲ ಗುಡ್ಡೆ ಬಡ್ತ್‌ದ್ ಬತ್ತೆರ್… ಸುತ್ತ ತೂನಗ ಇಡೀ ಕಾಡೇ ತೋಜುಂಡು.. ಸೀನೆ ದೂರದ ಗುಡ್ಡೆನ್ ತೋಜದ್ ಪನ್ಪೆ.. ತೂಲೆ ಅವ್ವೇ ಇಲ್ಯ ಮಲೆ.. ಅಲ್ಪನೆ ವಜ್ರದ ಕಲ್ಲ್ ಉಪ್ಪುನು. ಪನ್ನಗ ನಾಲ್ ಜನತ ಮೊನೆಡ್ಲ ಹರ್ಸೊ ದಿಂಜುಂಡು..!

ನಿಕ್ಲು ನಾಲ್ ಕಬೆನ್ ಕಡ್ತೊಂದು ಬಲೆ.. ಮೂಲೇ ಅಟ್ಟೊಲಿಗೆ ಪಾಡ್ದ್ ಇನಿತೆಗ್ ಮುಲ್ಪ ಕುಲ್ಲುಗ. ಎಲ್ಲೆ ಕಾಂಡೆ ಆ ಗುಡ್ಡದ ಕರೆಕ್ ಪೋಯಿಂದ್ ಪನ್ಪೆ… ವಜ್ರದ ಇಲ್ಯ ಮಲೆ ತೋಜಿನ ಕುಸಿಟ್ ನಾಲ್ ಜವನೆರ್ಲ. ಬಾರಿ ಹುರುಪುಡು. ಕಂಬೊ ಕಡ್ತ್‌ದ್ ಚಪ್ಪರದ ಲೆಕ್ಕ ಅಟ್ಟೊಲಿಗೆ ಪಾಡ್ದ್. ಅವೆಕ್ ಬಡ್ತರೆ ಏಣಿಲ ತಯಾರ್ ಮಲ್ಪುವೆರ್..

. ಸೀನೆ ಅಕ್ಲೆಗ್ ಗಂಜಿ ಕಜಿಪು ಮಲ್ತ್‌ದ್ ಕೊರ್ದು. ಅಕ್ಲೆ ಒಟ್ಟುಗು ಕೆಲಸೊಗು. ಸೇರೊಂದು. ಬೈಯದ ಚಾ ಪರ್ದ್… ಒಂತ್ತೆ ಕೆಲಸ ಮಲ್ಪುವೇ… ಈತ್ ದಿನಟ್ ಇಂಚ್ಚ ಬೆನಂದಿನ ಜವನೆರೆನ್ ತೂದು ಪಾಪೊನೆಂದ್ ಆಂಡ್.. ಬೈಯ ಐನ್ ಗಂಟೆಗೆ ಅಕ್ಲೆನ್ ಮೀದ್ ಬರ್ಯರೆ ಪನ್ಪೆ.. ಅಲ್ಪನೆ ಇತ್ತಿನ ಪಲ್ಲದ ನೀರ್ಡ್ ಮೀದ್ ಜವನೆರ್ ಬನ್ನಗ ಅಕುಲೆಗ್ ಬೆಚ್ಚ ಬೆಚ್ಚ ಗಂಜಿಲ ನುಂಗೆಲ್ ಮೀನ್ ಸೂಟು ಪಾಡ್ದ್ ಕೊರ್ಪೆ.. ಜವನೆರ್ ಬೇಗನೆ ವನಸ್ ಮಲ್ತ್‌ದ್ ಅಟ್ಟೊಲಿಗೆ ಏರೊನುವೆರ್.. ಕತ್ತಲೆ ಆಂಡ ಕಷ್ಟ ಪನ್ದ್ ಸೀನೆಲ ಬೇಗ ಬೇಗ ಕರೊ ಪಾತ್ರೊನು ದೆಕ್ಕ್‌ದ್ ಚೀಲೊಗು ದಿಂಜದ್ ಅಟ್ಟೊಲಿಗೆಗ್ ಪಾಡುವೆ.. ಕಡೆಕ್ ದಿಕ್ಕೆಲ್ ಪಾಡಿನ ಕಲ್ಲ್‌ನ್ ಜಾರದ್.. ದಿಕ್ಕೆಲ್‌ದ ಕರೆಡ್ದ್. ಒಂಜಿ ಪುಂಡಿ ಬೊನ್ಯ ದೆಪ್ಪುವೆ… ತನ್ನ ಬೈರಾಸ್‌‌ದ ಕೋಡಿನ್ ಇಲ್ಯೆಡೆ ಪರಿತ್‌ದ್ ನಾಲ್ ತುಂಡು ಮಲ್ತ್‌ದ್… ದೆತ್ತ್ ದೀನ ಬೊನ್ಯರ್ದ್. ಒಂತೆ ದೆತೊಂದು. ನಾಲ್ ಕುಂಟುದ ತುಂಡುಗುಲ ಪಾಡ್ದ್. ಒಂಜಿ ಉರ್ಕುದ ಗಂಟ್‌ದಲೆಕ್ಕ ಮಲ್ಪುವೆ.. ಅವೆನ್ ನಾಲೆನ್ಲ ರಡ್ ಕೈತ ಅಂಗೈತ ನಡುಡು ದೀತ್. ಅಪ್ಪೆ ಭಗವತಿನ ನಾಮ ಸ್ಮರಣೆ‌ ಮಲ್ತ್‌ದ್. ಆ ಕುಂಟುದ ತುಂಡುಲೆನ್ ಕಣ್‌ಗ್ ಒತ್ತುದು.. ಬಾಯಿಡ್ ಮೂಜಿ ಸಲ ಉರಿಪುವೆ..

ಬೊಕ್ಕ ಅಟ್ಟೊಲಿಗೆ ಏರ್‌ದ್. ಆ ನಾಲ್ ಕುಂಟುದ ಉರ್ಕುನು ನಾಲ್ ಜವನೆರೆಗ್ಲ ಕೊರ್ದು ಕಂಟೆಲ್‌ಗ್ ಕಟೊನರೆ ಕೊರ್ಪೆ…

ಚಲ್ಲ್ ಕುಂಟುದ ಲಾಡಿದ ಗಂಟ್‌ ತೂನಗನೇ ಅಕ್ಲೆಗ್ ತೆಲಿಕೆ ಬರ್ಪುಂಡು.. ತೆಲಿತ್ಂಡ ಸೀನಗ್ ಕೋಪ ಬರುಂದು ಎನ್ನಿದ್ ಬೇಗ ಕಂಟೆಲ್‌ಗ್ ಕಟೊನುವೆರ್…

ಪೊರ್ತು ಕತ್ತಲೆ ಆಂಡ್… ಉಮಿಲಿದ ಪಟ್ಟ್ ಜೋರುಂಡು… ಅಟ್ಟೊಲಿಗೆದ ದೂರೊಡು ಬಜಕುರೆ ರಾಶಿ ಪಾಡ್ದೆರ್… ಸೀನೆ ಅವೆಕ್ ಸೂ ಕೊರ್ದು ಬತ್ತೆ… ದೂರೊಡ್ದು ಚಂದ್ರನ ತಿಂಗೊಳ್ದ ಬೊಲ್ಪು ಒಂಜಿ ಕರೇಟ್ ಬೂರೊಂದುಂಡು…

ರಾತ್ರಿ ಆಂಡ್.. ಸೀನೆ ಮಲೆ ಚಾಮುಂಡಿನ್ ಭಗವತಿನ್ ಎನ್ನಿದ್ ಅಕ್ಲೆ ಅಟ್ಟೊಲಿಗೆದ ನಾಲ್ ಕಂಬೊಗ್ಲ ಬಸ್ಮ ಪೂಜಿದ್ ಅಟ್ಟೊಲಿಗೆ ಏರ್‌ದ್ ಜೆಪ್ಪಪುವೆ… ತಿಂಗೊಳುದ ಬೊಲ್ಪುಗು. ಪೊತ್ತುನ ಬಜಕುರೆದ ಬೊಲ್ದು ಪುಗೆ. ಹಲವು ಆಕಾರೊಡು ತೋಜೊಂದು. ಇತ್ತೊ…

ಜವನೆರ್ ನಿದ್ರೆಡ್ ಗೊರಕ್ಕೆ ಒಯ್ಪುನ ಸಬ್ದೊಗು ಸೀನಗ್ ನಿದ್ರೆ ಬರಂದೆ ಪುಡೆರೊಂದುಲ್ಲೆ… ಬೊಡೆದಿನ್ ಎಂಚ್ಚ ಉಲ್ಲಲಾಂದ್ ಎನ್ನಿದ್ ಕಣನೀರಲ ಬತ್ತ್ಂಡ್.. ಎಂಚ್ಚನೇ ಆವಡ್ ಇನಿತ ಒಂಜಿ ರಾತ್ರಿ ಅತ್ತ.. ಎಲ್ಲೆ ಮೊಕ್ಲೆಗ್ ವಜ್ರದ ಕಲ್ಲ್‌ದ ಜಾಗನ್ ತೋಜದ್ ಸೀದ ಊರುಗು ಪೋಪುನತ್ತ.. ಕಾಸ್ ಕೊರ್ಯೆರ್ಂಡ ದೆತೊನ್ನು ಇಜ್ಜಿಂಡ ಬೊಡ್ಚಿ.. ಇಂಚ್ಚ ಮಾತ ಹಲವು ವಿಚಾರೊಲೆನ್ ಎನ್ನೊಂದು ಉಪ್ಪುನಗ.. ಅಕ್ಲು ಜೆತ್ತಿನ ಅಟ್ಟೊಲಿಗೆದ ಅಡಿರ್ದ್ ಪಟ ಪಟಂದ್ ಸಬ್ದೊ ಕೇನುಂಡು..! ಸಬ್ದೊ ದಾದಂದ್ ಕಂಕನೆ ಜೆತ್ತ್‌ದ್ ತಿರ್ತ್ ನೆಲಕ್ಕ್ ತೂಪೆ.. ತೂನಗ ಐನ್ ಬೊಲ್ದು ಮೈಂದ್‌ದ ರೀತಿದ ರೂಪೊಲು..! ‌ ಅಟ್ಟೊಲಿಗೆ ಅಡಿಟ್ ಪರತೊಂದುಲ್ಲೊ..! ಸೀನಗ್ ಆಂಡ್ ಒಂಜೆರ್ದ್ ಒಂಜಿ ದಿನಾಲ ಇಂಚ್ಚನೇ ತೂವರೆ ತಿಕ್ಕೊಂದುಲ್ಲ.. ಉಂದು ಎಂಕ್ಲೆನ ಅಪಾಯದ ಸೂಚನೆ..! ಚೂರು ಮೈ ತತ್ತ್ಂಡ ಸಾವೆ ಗತಿ..! ನನ ಈ ಜವನೆರೆಗ್ ಎಚ್ಚರ ಆದ್ ತೂದು ಪೋಡಿತೊಂಡೆರ್ಂಡ.. ಅವೆಕ್ ಮರ್ದ್ ಇಜ್ಜಿ… ಒಯ್ಕ್‌ಲ ಅಪ್ಪೆನೇ ಗತಿ ಪನ್ದ್. ಕಂಟೆಲ್‌ಡ್ ಕಟ್ಟಿನ ಭಗವತಿನ ನೂಲುನು ಪತೊಂದು.. ಅಪ್ಪೆನ್ ಸುಗಿಪುವೆ.. ಕಣ್ಣ್ ಮುಚ್ಚಿದ್ ಕಣ್ಣ್ ಬುಲಾನಗ.. ಗುಡ್ಡೆದ ತಿರ್ತ ಮೈಯಿರ್ದ್ ಒಂಜಿ ದೀಪೊದ ಬೊಲ್ಪು. ಇಂಚ್ಚಿ ಬರ್ಪುನ ತೋಜುಂಡು..!

ಆ ದೀಪದ ಬೊಲ್ಪು ತೋಜಿನಗ ಅಟ್ಟೊಲಿಗೆದ ಅಡಿಟ್ ಪರತೊಂದು ಇತ್ತಿನ ರೂಪೊಲು ಕಾಡ್‌ದಂಚ್ಚಿ ಬಲಿಪರೆ ಸುರು ಮಲ್ತೊ… ಇಲ್ಯ ತಿಂಗೊಲ್ದ ಬೊಲ್ಪುಗು ಅವೆನ ರೂಪೊಲು ಬೊಲ್ದು ಸೀರೆ ಗಾಳಿಗ್ ರಾವೊಂದು ಇತ್ತಿನ ರೀತಿ ತೋಜೊಂದು ಇತ್ತೊ… ಬೊಲ್ದು ಸೀರೆನೇ ಗಾಳಿಗ್. ರಾವೊಂದು ಪೋಯಿಲೆಕ್ಕ ತೋಜಿಂಡ್..

ಸೀನಗ್ ಏತೇ ಧೈರ್ಯ ಇತ್ತ್ಂಡಲ ಉಲಯಿಡೊಂಜಿ ಪೋಡಿಗೆ ಉಂಡು.. ಎಂಕ್ಕ್ ದಾಲ ಆಂಡ ಎನ್ನ ಬೊಡೆದಿನ ಗತಿ ದಾದ ಆವುಂದು.. ಆಂಡಲ ಭಗವತಿನ್ ನಂಬಿನೆಗ್ ಅಂಚ್ಚಿನ ಆಪತ್ತ್ ಬರಂದ್ ಪನ್ದ್ ಧೈರ್ಯ ದೆತೊನುವೆ…

ದೀಪೋದ ಬೊಲ್ಪು. ಬತ್ತ್ ಬತ್ತ್‌ದ್ ಮೊಕ್ಲೆ ಅಟ್ಟೊಲಿಗೆ ಕೈತಲ್ ಬತ್ತ್ಂಡ್… ಸೀನೆ ಸರೀ ತೂಪೆ..

ತೂನಗ. ಒಂಜಿ ಕೆಂಪು ಸೀರೆದ ಪೊಂಜೊವು..!

ಸೀನಗ್ ಕೈ ಕಾರ್ ದರ್ಪರೆ ಸುರು ಆಂಡ್.. ಉಂದು ವಾ ರಕ್ಕಸೆರೆ ರೂಪ ಆದಿಪ್ಪು ಪನ್ದ್.. ಮಾಸ್ತಿ ಉಂಡುಂದ್ ಪನ್ಪಿನೆನ್ ಕೇನ್ದೆ.. ಆಂಡ ತೂತುಜೆ ಉಂದು ಓಲಾಂಡಲ ಮಾಸ್ತಿಯಾ…? ಪನ್ದ್ ಅಲೋಚನೆ ಮಲ್ಪುನಗ..

ದೀಪ ಪತೊಂದು ಬತ್ತಿ ಪೊಂಜೊವು ಮೊಕ್ಲೆ ಅಟ್ಟೊಲಿಗೆದ ಏಣಿದ ಕೈತ್ತಡೆ ಬರೊಂದುಂಡು… ದೀಪದ ಬೊಲ್ಪುಲ ತಿಂಗೊಳ್ದ ಬೊಲ್ಪುಲ ರಡ್ ಸೇರ್ದ್ ಆ ಪೊಂಜೊವುನ ರೂಪ ಸರಿಯಾದ್ ತೋಜುಂಡು… ಸೀನಗ್ ಒಂಜಿ ಡೌಟ್.. ಉಂದು ಏರೋ ಈ ಕಾಡ್‌ಡ್ ಇಲ್ಲ್ ಮಲ್ತ್‌ದೆರ್.. ಆ ಇಲ್ಲದ ಪೊಂಜೊವು ಆದುಪ್ಪು ಪನ್ದ್ ಗೇನ ಮಲ್ಪುನಗ.. ಏಣಿದ ಅಡಿರ್ದ್ ಅಣ್ಣಾ… ಪನ್ದ್ ಲೆಪ್ಪುನ ದನಿ ಕೇನುಂಡು.. ಒಂಜಿ ಲೆಪ್ಪುಗು ಓ ಕೊರ್ಯರೆ ಬಲ್ಲಿಗೆ.. ಅಂಚ್ಚ ಮೂಜಿನೆ ಸಲತ ಲೆಪ್ಪುಗು ಓ ಕೊರುವೆ… ದೀಪ ಪತೊಂದು ಬತ್ತಿ ಪೊಂಜೊವು ಸೀದ ಏಣಿ ಏರ್ದ್ ಅಟ್ಟೊಲಿಗೆದ ಮಿತ್ತ್ ಬರ್ಪುಂಡು…!

(ಮುಂದುವರಿಯುಂಡು)

ಮಾಯೊದ ಪುಣ್ಣಮೆ: ಕಥಾ ಧಾರಾವಾಹಿ | ಭಾಗ -5

AUTHOR:M RAMA ISHWARAMANGALA

under section 107 of the Copyright Act 1976, allowance is made for “fair use” for purposes such as criticism, comment, news reporting, teaching, scholarship, education and research.

©WWW.GOLDFACTORYNEWS.COM